ცნობილ რუს არტისტს პეტრე პავლენსკის, სასამართლომ ვანდალიზმის მუხლით პატიმრობა მიუსაჯა. დაკავებულმა საზოგადოებას რამდენიმე პროვოკაციული პერფორმანსით დაამახსოვრა თავი — პირის ამოკერვით, შიშველ ტანზე მავთულხლართების შემოხვევით, წითელ მოედანზე გენიტალიების მიჭედებითა და სხვა მსგავსი დადგმებით.

გუშინ, 19 მაისს, მას 2014 წელს, სანკტ-პეტერბურგში მოწყობილი პერფორმანსისთვის 16 თვიანი პატიმრობა მიუსაჯეს. აქცია სახელწოდებით თავისუფლება უკრაინაში მიმდინარე საპროტესტო მიტინგებს ეხმაურებოდა. პავლენსკიმ და მისმა თანამოაზრეებმა ქალაქის ცენტრში საბურავები დაწვეს.

მიუხედავად განაჩენისა, პავლენსკის მისჯილი 16 თვის მოხდა არ მოუწევს, რადგან საქმის ხანდაზმულობის ვადა უკვე გასულია. თუმცა, პატიმრობაში მაინც რჩება. არტისტი სამ წლიან სასჯელს იხდის, რომელიც მას 2015 წლის ნოემბერში გამართული პერფორმანსის გამო მიესაჯა.

პავლენსკიმ ФСБ-ს, ყოფილი КГБ-ს შენობის შესასვლელ კარს ცეცხლი წაუკიდა, რითაც ფედერალური სააგენტოს მოქმედების მეთოდები გააპროტესტა.

არტისტმა სასამართლო პროცესიც პერფომანსად აქცია. ის მოსამართლისა და პროკურორისგან უფრო მკაცრ სასჯელს მოითხოვდა, ხოლო მისმა დაცვის მხარემ მოწმეებად სექს-მუშაკები მოიწვიეს, რომლებმაც პავლენსკის ინსტრუქციით სასამართლოს განუცხადეს, რომ არტისტის პერფორმანსები მათ მორალურ გრძნობებს შეურაცხყოფდა.