CRRC საქართველოს ახალი კვლევის მიხედვით, მოსახლეობა ყველაზე მეტად რელიგიურ ინსტიტუტებსა და ჯარს ენდობა, ყველაზე ნაკლებად — პოლიტიკურ პარტიებსა და არასამთავრობო ორგანიზაციებს. გამოკითხულთა 40% აცხადებს, რომ რელიგიურ ინსტიტუტებს სრულად ენდობა, 43%-ის თქმით კი, ძირითადად ენდობა. რაც შეეხება ჯარს, კვლევის მიხედვით, 22% სრულად ენდობა, 59% კი — ძირითადად ენდობა. შემდეგ მოდის პოლიცია, რომელსაც ჯამში 66% ენდობა (45% — "ძირითდად ვენდობი", 11% — "სრულად ვენდობი"). იგივე მაჩვენებლი აქვს ჯანდაცვის სისტემასაც (44% — "ძირითდად ვენდობი", 12% — "სრულად ვენდობი").

რაც შეეხება პოლიტიკურ პარტიებს, კვლევის მიხედვით, მათ ნდობას მხოლოდ 18% უცხადებს, უფრო მეტი კი, 33%, უნდობლობას. არასამთავრობო ორგანიზაციებს 24% ენდობა, ხოლო 22% არ ენდობა.

ამავე კვლევის მიხედვით, მოსახლეობის ნახევარზე მეტი მიიჩნევს, რომ დემოკრატია ყველა წყობაზე უკეთესია. ორგანიზაციაში აღნიშნავენ, რომ ეს 2013 წლის შემდეგ დემოკრატიის მხარდაჭერის ყველაზე მაღალი მაჩვენებელია.

CRRC საქართველომ კვლევა 2020 წლის 8-14 დეკემბერს ჩაატარა. ორგანიზაციის ცნობით, სატელეფონო ინტერვიუების მეშვეობით გამოკითხულია ე.წ. შემთხვევითი ნომრების გენერირების პრინციპით (Random Digit Dial) ამორჩეული 1 504 რესპონდენტი. ინტერვიუები ჩატარდა აზერბაიჯანულ, სომხურ, რუსულ და ქართულ ენებზე და გამოპასუხების დონე 29%-ს შეადგენს. ცდომილების ზღვარი კი +/-0,7%-დან +/-7,4%-მდე მერყეობს.