სამოქალაქო აქტივისტი, ელენე ხოშტარია აცხადებს, რომ ე.წ. კარტოგრაფების საქმეზე დაკავებულების, ივერი მელაშვილისა და ნატალია ილიჩოვას შესაძლო გირაოთი გათავისუფლება არ ნიშნავს, რომ ოპოზიცია პარლამენტში შევა. მისი თქმით, მანდატებზე ადამიანების თავისუფლებით ვაჭრობა ამორალურობაა.

"თუ ვინმეს აქვს ილუზია, რომ ამით ვინმეს შეიყვანენ პარლამენტში, ეს არის შეურაცხმყოფელი. რადგან ვაჭრობა ადამიანებით მანდატებზე არის გაუგონარი ამორალურობა. ამასთანავე, თუ ყველა პოლიტპატიმარს გამოუშვებენ პოლიტიკური პროცესის გაჯანსაღების შანსი გაჩნდება ქვეყანაში", — განაცხადა ელენე ხოშტარიამ On.ge-სთან საუბრისას.

ელენე ხოშტარია ამბობს, რომ ივერი მელაშვილისა და ნატალია ილიჩოვას დაჭერაც და შესაძლო გათავისუფლებაც პოლიტიკური გადაწყვეტილება.

"აბსოლუტურად ცხადია, რომ არის პოლიტიკური გადაწყვეტილება. როგორც ამ ხალხის დაჭერა იყო პოლიტიკური გადაწყვეტილება, ასევე მათი გამოშვება არის პოლიტიკური გადაწყვეტილება. მნიშვნელოვანი არის ის, რომ პოლიტიკურ გადაწყვეტილებას იღებენ მაშინ, როცა ამას აქვს პოლიტიკური ფასი და პოლიტიკურ ფასს ქმნის მოქალაქეების აქტიურობა და შეუგუებლობა უსამართლობასთან. რომ არა ხალხის გაუჩერებელი პროტესტი, ამ გადაწყვეტილებას არ მიიღებდნენ და ასე უნდა გავაგრძელოთ ყველა პოლიტიკური პატიმრის მიმართებაში. გიორგი რურუაც გამოსაშვებია. ახლა გოგი მანჯგალაძეს მიადგნენ. არ უნდა დავუშვათ, რომ მხოლოდ სახელები და გვარები შეიცვალოს პოლიტპატიმრების", — ამბობს ელენე ხოშტარიამ On.ge-სთან.

ამ წუთებში თბილისის საქალაქო სასამართლოში სასამართლო სხდომა მიმდინარეობს. საქმის პროკურორის, მიხეილ სადრაძის ინფორმაციით, დღევანდელ სასამართლო სხდომაზე ბრალდებული ივერი მელაშვილისა და ნატალია ილიჩოვასთვის აღკვეთის ღონისძიების შეცვლას მოითხოვენ და დააყენებენ შუამდგომლობას, რომ მათ პატიმრობის ნაცვლად გირაო შეეფარდოთ.

გაიგეთ მეტი: