2022 წელს ზუსტად ოცდახუთი წელი გავა პრინცესა დაიანას გარდაცვალებიდან. ამ თარიღის წინ კი გაერთიანებული სამეფოს უახლოესი წარსულის ერთ-ერთი ყველაზე მნიშვნელოვანი ფიგურის ცხოვრების დეტალებს კიდევ ერთხელ გააცოცხლებენ ეკრანებზე.

სპენსერი (Spencer) — პრინცესა დაიანას გვარი იქნება მომავალი ფილმის სახელწოდება, რომელშიც მთავარ როლს ცნობილი ამერიკელი მსახიობი კრისტენ სტიუარტი შეასრულებს. სულ ახლახან ამ როლში სტიუარტის პირველი ფოტო გავრცელდა და შესაძლებლობა გვაქვს, ვიზუალურად მიახლოებით შევაფასოთ, თუ როგორ განასახიერებს ის ლედი დის.

ფოტო: NEON

დიახ, ეს იგივე მსახიობია, ვინც ბინდის სახელით ცნობილ ფილმების სერიაში ბელას როლი მოირგო.

ამ ახალ ფილმს ჩილელი რეჟისორი პაბლო ლარაინი იღებს, რომელსაც მაყურებლები ყველაზე კარგად 2016 წელს გამოსული ფილმით Jackie იცნობენ, რომელშიც ნატალი პორტმანმა აშშ-ის პრეზიდენტ ჯონ კენედის ცოლის, ჟაკლინ კენედის როლის შესრულებით ოსკარის ნომინაცია დაიმსახურა.

აღსანიშნავია, რომ ეს პირველი შემთხვევა არ არის, როცა პრინცესა დაიანას შესახებ ფილმს ან სერიალს იღებენ: 2013 წელს გამოვიდა ფილმი დაიანა, რომელშიც მთავარ როლში ნაომი უოტსი მოგვევლინა, ხოლო გასულ წელს ნეტფლიქსის გახმაურებული სერიალის გვირგვინი მეოთხე სეზონში გამოჩნდა უელსის პრინცესას პროტოტიპი, რომელიც ემა კორინმა განასახიერა.

ნაომი უოტსი პრინცესა დაიანას როლში.

ფოტო: SHUTTERSTOCK

ემა კორინი პრინცესა დაიანას როლში.

ფოტო: Netlix

მომავალი ფილმი სპენსერი ერთ უქმეებზე განვითარებულ მოვლენებზე მოგვითხრობს, როცა პრინცესა დაიანა თავისი ქორწინების წარუმატებლობაზე დაფიქრდება და გადაწყვეტს, რომ პრინც ჩარლზს უნდა გაშორდეს.

გადაღებები უკვე დაწყებულია და მისი პრემიერა, სავარაუდოდ, 2021 წლის შემოდგომაზე შედგება.