საქართველოს პარლამენტის თავმჯდომარის, არჩილ თალაკვაძის განცხადებით, ძალიან მალე მოვა ის დრო, როცა ოპოზიციური ჯგუფები პარლამენტში ფრაქციებსაც შექმნიან. ამის შესახებ მან ბიუროს სხდომაზე ისაუბრა.

"დღეს განიხილება რეგლამენტში ცვლილებები, მოგეხსენებათ ამასთან დაკავშირებით ჩვენ საზოგადოებას მივაწოდეთ ინფორმაცია. არგუმენტაცია ამ ცვლილებების გარშემო არის ის, რომ იმ ფონზე, როდესაც კიდევ უფრო მეტი ოპოზიციის წარმომადგენელი ერთვება საპარლამენტო პროცესში, მაქსიმალურად მათ მიეცეთ საშუალება, რომ გამოიყენონ ის საპარლამენტო ინსტრუმენტები, რომელიც რეგლამენტით აქვთ მიცემული ოპოზიციურ ფრაქციებს. თუმცა მინდა გითხრათ, რომ ძალიან მალე მოვა ის დრო, როცა ოპოზიციური ჯგუფები ფრაქციებსაც შექმნიან საქართველოს პარლამენტში", — განაცხადა თალაკვაძემ.

დღეს პარლამენტი განიხილავს ცვლილებებს, რომლის მიხედვითაც, ოპოზიციის წარმომადგენლებს შეეძლებათ გაერთიანდნენ ერთ ჯგუფად და პარლამენტის თავმჯდომარის მოადგილეები წარადგინონ.

ოპოზიცია 2020 წლის 31 ოქტომბერს ჩატარებული საპარლამენტო არჩევნების შედეგებს არ აღიარებს. მათ უარი თქვეს არჩევნების მეორე ტურში მონაწილეობასა და საპარლამენტო მანდატებზე. პოლიტიკური კრიზისიდან გამოსასვლელად მმართველ პარტიასა და ოპოზიციას შორის მოლაპარაკებები აშშ-სა და ევროკავშირის ელჩების შუამავლობით მიმდინარეობს. უკვე გაიმართა მოლაპარაკებების ოთხი რაუნდი. მეხუთე რაუნდი, სავარაუდოდ, იანვრის ბოლომდე გაიმართება.