ნამახვანის ჰესების კასკადის პროექტის განმახორციელებელმა კომპანია ენკამ (ENKA İnşaat ve Sanayi A.Ş.) ახალი ვებ-გვერდი - www.namakhvani.com აამოქმედა.

პროექტის შესახებ ძირითად ინფორმაციასთან ერთად, ვებ-გვერდზე ქართულ და ინგლისურ ენებზე განთავსდა გარემოზე ზემოქმედების შეფასების (გზშ) ანგარიში, უცხოელი და ქართველი სპეციალისტების კვლევები. კომპანიის ინფორმაციით, სწორედ ამის საფუძველზე მომზადდა გზშ ანგარიში და შესაბამისი სანებართვო დოკუმენტაცია.

"ნამახვანჰესი ამ დღეისთვის საქართველოში ყველაზე მსხვილი საინვესტიციო პროექტია და შესაბამისად, საზოგადოების ინტერესიც მაღალია. ჩვენი პრიორიტეტია, ვიმუშავოთ მაქსიმალური გამჭვირვალეობის პრინციპებზე დაყრდნობით. ახალი ვებ-გვერდი ამაში დაგვეხმარება", — აღნიშნა გენერალურმა მენეჯერმა ზეკი ქოჯაოღლუმ.

კომპანიაში აცხადებენ, რომ ნამახვანის ჰესების კასკადი სახელმწიფო მნიშვნელობის პროექტია, რომლის დანიშნულება ქვეყნის იმპორტდამოკიდებულების შემცირება და ენერგოდამოუკიდებლობის განმტკიცებაა. მათი თქმით, ის 800 მილიონ აშშ დოლარამდე მოცულობის პირდაპირი უცხოური ინვესტიციით ხორციელდება. კომპანიის განცხადებით, 430-მეგავატიანი კასკადის წლიური გამომუშავება 1,500 გგვთ.სთ-ს მიაღწევს, რაც 2019 წელს საქართველოს მთლიანი მოხმარების 11.7%-ის ტოლია.