პარლამენტის თავმჯდომარის, არჩილ თალაკვაძის განცხადებით, ერთ კვირაში პარლამენტში დეპუტატებისთვის უფლებამოსილების საკითხზე იმსჯელებს, შესაბამისად, ოპოზიციურ პარტიებს გადაწყვეტილების მისაღებად ერთი კვირა აქვთ.

"შესაბამისად, რჩება ერთი კვირა იმისათვის, რომ ოპოზიციურმა პარტიებმა გადახედონ თავის გადაწყვეტილებას, გადახედონ მოლაპარაკებების პირობებს, მიიღონ საბოლოო გადაწყვეტილება ამასთან დაკავშირებით", — განაცხადა თალაკვაძემ.

როგორც იგი განმარტავს, საპროცედურო საკითხთა კომიტეტი რეგლამენტით კონკრეტულ ვადებს ფლობს, რომელიც უკვე ამოიწურა და მათ ვალდებულება აქვთ მომდევნო პირველი სხდომაზე საკითხი კენჭისყრაზე გაიტანონ.

"რა თქმა უნდა, ვისაც ვერ დაუკავშირდა კომიტეტი პოზიციის გადასამოწმებლად, მათი განცხადების ვერიფიკაციისთვის, მათთან მიმართებით ჩვენთვის ინდიკატორი იქნება ის ადამიანები კენჭისყრის დღეს წარმოდგენილი იქნებიან თუ არა სხდომათა დარბაზში", — განაცხადა თალაკვაძემ.

პატრიოტთა ალიანსის საარჩევნო სიის წევრების პარლემენტში შესვლის შემდეგ, მხოლოდ მოქალაქეებისა და გირჩის წევრები ამბობდნენ უარს საპარლამენტო მანდატების გაუქმებაზე მანამ, სანამ მმართველ პარტიასთან მოლაპარაკებები არ დასრულდებოდა. სხვა ყველა ოპოზიციურმა პარტიამ მანდატებზე ოფიცალურად თქვა უარი.

ბოლო კვირებია მოქალაქეები და გირჩი ოპოზიციურ პარტიებთან ინდივიდუალური მოლაპარაკებების გამართვას ცდილობენ. მათ სურთ განიხილონ იდეა, რომლის მიხედვითაც 2021 წლის ადგილობრივი თვითმმართველობის არჩევნები შესაძლოა პლებისციტად ჩაითვალოს — თუ თვითმმართველობის არჩევნებში ოპოზიცია გაიმარჯვებს, უნდა ჩატარდეს ვადამდელი საპარლამენტო არჩევნები, თუ მმართველი პარტია — ვადამდელი საპარლამენტო არჩევნების ჩატარებას აზრიც ეკარგება.

18 იანვარს, ინდივიდუალურ მოლაპარაკებაზე მათ საჯაროდ უარი უთხრა სტრატეგია აღმაშენებლის ლიდერმა, გიორგი ვაშაძემ. 19 იანვარს, მსგავსი შინაარსის განცხადება ლელოს ერთ-ერთმა ლიდერმა, საბა ბუაძემაც გააკეთა. ერთიანი ნაციონალური მოძრაობის თავმჯდომარეს, ნიკა მელიას, მათთან შეხვედრაზე უარი არ უთქვამს და განაცხადა, რომ გირჩისა და მოქალაქეების ლიდერებს მიმდინარე თვის ბოლოს შეხვდება. მოქალაქეებისა და გირჩის ეს იდეა შეაფასა გირჩის ყოფილმა და ახლა უკვე პარტია გირჩი — მეტი თავისუფლების ლიდერმა, ზურაბ ჯაფარიძემაც. მისი თქმით, ოპოზიციურ სპექტრში ამ იდეაზე შეთანხმების და შემდეგ, ქართული ოცნების თანხმობის შანსი ნულის ტოლია.

გაიგეთ მეტი: