სპეციალური პენიტენციური სამსახურში, სახალხო დამცველის, ნინო ლომჯარიას განცხადებაზე საპასუხოდ აცხადებენ, რომ სამსახურის ხელმძღვანელობა ომბუდსმენისა და პრევენციის ეროვნული მექანიზმის წარმომადგენლების მიერ პენიტენციურ დაწესებულებებში არსებული სიტუაციის მონიტორინგის განხორციელებას ყველანაირად უწყობს ხელს. უწყებაში ირწმუნებიან, რომ ამას მოწმობს თუნდაც ის, რომ პანდემიასთან დაკავშირებული შეზღუდვების მიუხედავად, სახალხო დამცველის წარმომადგენლებს პენიტენციურ დაწესებულებებში შესვლისა და მონიტორინგის განხორციელების პრობლემა არ შექმნიათ.

"რაც შეეხება მათზე თითქოსდა ორგანიზებულ თავდასხმებს პატიმრების მხრიდან, უწყების ხელმძღვანელობას არ აქვს არანაირი ბერკეტი, ზეგავლენა მოახდინოს პატიმრების განწყობაზე ომბუდსმენის, ან ნებისმიერი სხვა ინსტიტუციისა და კერძო პირის მიმართ. თუკი რომელიმე პენიტენციურ დაწესებულებაში ომბუდსმენის მიმართ პატიმრები რაიმე საკითხთან დაკავშირებით გამოხატავენ უკმაყოფილებას, ეს არის მხოლოდ მათი განწყობა და არანაირად არ არის დაკავშირებული, ან მით უმეტეს მართული პენიტენციური დაწესებულებების ადმინისტრაციის მიერ. უფრო მეტიც, ასეთ შემთხვევებში, რა თქმა უნდა, პენიტენციური დაწესებულებების ადმინისტრაციის წარმომადგენლები მაქსიმალურად იცავენ ომბუდსმენის წარმომაგენლების უსაფრთხოებას და იმედია, ამას თავად ეს პირებიც ვერ უარყოფენ", — განაცხადეს სპეციალურ პენიტენციურ სამსახურში.

მათი განმარტებით, პენიტენციურ სამსახურს არანაირი ბერკეტი არ აქვს იმისთვის, რომ პატიმრების მიერ ომბუდსმენის აპარატისადმი მიმართვიანობაზე გავლენა მოახდინოს, ვინაიდან, როგორც უწყებაში აცხადებენ, პატიმრები თავისუფალი მიმოწერის და სატელეფონო კომუნიკაციის უფლებით სარგებლობენ (ცალკეული გამონაკლისების გარდა, რაც კანონმდებლობით რეგულირდება) და პენიტენციური დაწესებულებები ადრესატისთვის პატიმრების წერილების გაგზავნას უზრუნველყოფენ.

"შესაბამისად, თუკი ომბუდსმენთან პატიმრების მხრიდან მიმართვიანობამ იკლო, სავარაუდოა, რომ, ეს ისევ და ისევ, ომბუდსმენის აპარატისადმი მათი განწყობით აიხსნება და არა რაღაც არარსებული ზეგავლენით ადმინისტრაციის მხრიდან. ამასთან, სპეციალური პენიტენციური სამსახური კიდევ ერთხელ ხაზგასმით აცხადებს, რომ არანაირი კრიმინალური სუბკულტურა პენტიენციურ დაწესებულებებში არ არსებობს. პენიტენციურ დაწესებულებებს მართავს სახელმწიფო და არა კრიმინალური ავტორიტეტები. ხოლო ის მსჯავრდებულები, რომლებიც მოისურვებენ სხვა პატიმრებზე გავლენის მოპოვებას, ნახევრადღია პენიტენციური დაწესებულებებიდან დახურულ დაწესებულებებში გადაყვათ, სადაც ისინი სხვა პატიმრებისგან იზოლირებულები არიან", — განმარტავენ პენიტენციურში.

დაწესებულებაში აცხადებენ, რომ ამას არეგულირებს საქართველოს იუსტიციის მინისტრის 2019 წლის 8 მაისის N395 ბრძანება. ბრძანების საფუძველზე კი, დოკუმენტის გამოცემიდან დღეის ჩათვლით ნახევრადღია პენტენციური დაწესებულებებიდან დახურულ დაწესებულებებში გადაყვანილია 60 მსჯავრდებული, ისინი, ვინც სხვა პატიმრებზე გავლენის მოპოვებას შეეცადა.

"შესაბამისად, დღეს პენიტენციურ სისტემაში კრიმინალური ავტორიტეტების რაიმე სახის ზეგავლენაზე საუბარი არის სიცრუე და მოცემული ინფორმაციის გავრცელება ემსახურება ერთადერთ მიზანს — საზოგადოების შეცდომაში შეყვანას", — აღნიშნეს უწყებაში.

საქართველოს სახალხო დამცველმა დღეს, 20 იანვარს გამართულ საგანგებო ბრიფინგზე პენიტენციურ დაწესებულებებში შექმნილ ვითარებაზე ისაუბრა. ომბუდსმენის თქმით, უკანასკნელი თვეების განმავლობაში, დაწესებულებების ადმინისტრაციის და ე.წ. ციხის მაყურებლების მიერ მართული პატიმრების გარკვეული ჯგუფი სისტემატიურად სახალხო დამცველის აპარატის წარმომადგენლებზე სიტყვიერ თავდასხმებს, მუქარასა და აგრესიას სისტემატიურად ახორციელებს. ლომჯარია აღნიშნავს, რომ ამ უკანონო ქმედებების მიზანი პატიმრებთან მათი კომუნიკაციისა და ციხის ტერიტორიაზე მონიტორინგის განხორციელების ხელშეშლაა.

ბრიფინგზე მან იუსტიციის მინისტრს, პენიტენციური სამსახურის გენერალური დირექტორისა და შესაბამისი პენიტენციური დაწესებულებების დირექტორების თანამდებობრივი პასუხისმგებლობის საკითხის დაყენებაც მოსთხოვა.

გაიგეთ მეტი: