სოფლის მუსლიმ და ქრისტიან თემებს შორის შეხვედრა დასრულდა. მხარეები კონფლიქტის აღმოფხვრასა და მშვიდობიან თანაცხოვრებაზე შეთანხმდნენ.

ღია შეხვედრას სოფლის ცენტრში ხელისუფლების წარმომადგენლები და სასულიერო პირები ესწრებოდნენ. ადგილობრივებმა თავიანთ პოზიციები გააჟღერეს და აღნიშნეს, რომ მშვიდობიანი ყოფა აუცილებელია.

"თითოეულმა ადამიანმა პასუხისმგებლობა აიღოს და ჭეშმარიტი პოზიცია დაიჭიროს. მოდი, ეს იყოს დასაწყისი უფრო დიდი სიყვარულის და ეს განსხვავება დავასრულოთ", — განაცხადა მუსლიმი თემის წარმომადგენელმა შეხვედრაზე.

"აქ ხართ ხართ ჩემი მოსწავლეები. თქვენ იცით, რომ რელიგიურ ნიადაგზე შეურაცხყოფა მოსწავლეების მიმართ არ ყოფილა. ჩვენ შესარიგებელი არაფერი გვაქვს, რადგან ერთმანეთს არ ვემდურით. ჩემს ხელში გაზრდილი ხართ და თქვენთვის სიცოცხლეს გავწირავ. [...] ნუ აყვებით ვიღაცა სხვას და სთხოვეთ ყველას თქვენი მხრიდან, ჩვენ ჩვენი მხარიდან, რომ დასრულდეს აგრესია", — განაცხადა შეხვედრაზე მყოფმა ერთ-ერთმა ქალმა.

ფოტო: თამთა კახაბერიძე / On.ge

ფოტო: თამთა კახაბერიძე / On.ge

მუსლიმებსა და მართლმადიდებლებს შორის რელიგიურ ნიადაგზე კონფლიქტი 12 იანვარს დაიწყო. ადამიანის უფლებების სწავლებისა და მონიტორინგის ცენტრის (EMC) ინფორმაციით, ბუკნარში მეზობლებს შორის მომხდარი ურთიერთშელაპარაკების დროს მძიმე ფიზიკური დაზიანებები მიაყენეს სამ მუსლიმს, მათ შორის ბავშვებს. დაშავებულები კი მიღებული არაერთი დაზიანებით საავადმყოფოში გადაიყვანეს.

პრემიერმინისტრი გიორგი გახარია აცხადებს, რომ მოქალაქეებს შორის რელიგიურ ნიადაგზე დაპირისპირების პროვოცირების საშუალებას სახელმწიფო არავის მისცემს.

ბუკნარში მომხდარ დაპირისპირებას გამოეხმაურა სახალხო დამცველი. ნინო ლომჯარიამ სოფელში განვითარებულ მოვლენებს სამწუხარო ფაქტი უწოდა და აღნიშნა, რომ მსგავსი შემთხვევა პირველი არ არის, სახელმწიფოს კი თითოეული მოქალაქის ლოცვის უფლების დაცვისკენ მოუწოდა.

EMC-ში აცხადებენ, რომ მომხდარ ინციდენტში 2 ძირითადი სამართლებრივი საკითხი იკვეთება — ძალადობის შემთხვევა დაზარალებული მუსლიმი პირების მიმართ, რომელიც დროულ და ეფექტიან სამართლებრივ რეაგირებას ითხოვს და სალოცავი სივრცის ფუნქციონირებისთვის უსაფრთხო და მშვიდობიანი პირობების შექმნა.

ევანგელისტურ-ბაპტისტური ეკლესია ხელისუფლებას მოუწოდებს, არა მხოლოდ ბუკნარის, არამედ დღემდე მომხდარ ყველა ინციდენტზე გამოძიება დაუყოვნებლივ დაიწყოს. მათი განცხადებით, ქვეყანას, სადაც ახალგაზრებს ლოცვისათვის თავს უტეხავენ, მომავალი არ აქვს.

შინაგან საქმეთა სამინისტროს ცნობით, დააკავეს პირი, რომელმაც 12 იანვარს ბუკნარში ორ თანასოფლელს ქვის გამოყენებით თავის არეში დაზიანებები მიაყენა. მათივე განცხადებით, გამოძიება საქართველოს სისხლის სამართლის კოდექსის 126-ე მუხლის 1-ლი ნაწილით მიმდინარეობს, რაც ცემას ან სხვაგვარ ძალადობას გულისხმობს და 6 თვიდან 1 წლამდე ვადით თავისუფლების აღკვეთას ითვალისწინებს.

გაიგეთ მეტი: