დღეს, 1 თებერვალს, 15 საათზე საკონსტიტუციო სასამართლოში ჩანიშნული განმწესრიგებელი სხდომა გადაიდო. როგორც ერთ-ერთი მოსარჩელე ირაკლი კუპრაძე ფეისბუქის საკუთარ გვერდზე წერს, სასამართლოსკენ მიმავალ პარლამენტის წარმომადგენელს შენობიდან ჩამოვარდნილი თოვლის დიდი მასა დაეცა და სასწრაფოთი დიაგნოსტიკაზე გადაიყვანეს.

საკონსტიტუციო სასამართლოს პრესსამსახურის ცნობით, ჯერჯერობით უცნობია თუ როდის გაიმართება სხდომა.

კერძოდ, საქმე ეხება უმაღლესი განათლების შესახებ საქართველოს კანონს. მოსარჩელეთათვის პრობლემურია ის გარემოება, რომ უმაღლესი საგანმანათლებლო დაწესებულების აკადემიური საბჭოს წევრის ასარჩევად და მის საქმიანობაში მონაწილეობის მისაღებად მოეთხოვებათ იყვნენ არჩეული უნივერსიტეტის თვითმმართველობის წევრებად, რაც მათი განმარტებით, ზღუდავს გაერთიანების თავისუფლების, დისკრიმინაციის აკრძალვის კონსტიტუციურ პრინციპებს და სახელმწიფო თანამდებობის დაკავების უფლებას.

მოსარჩელეები არიან თორნიკე გერლიანი, თამარ ონიანი, ელისაბედ შენგელია, ეკატერინე მუზაშვილი, ირაკლი კუპრაძე, გიგლა ვეკუა და დეა მინაძე, ხოლო მოპასუხე - საქართველოს პარლამენტი.