ბილაინი (შპს მობიტელი) სახელმწიფო კონსოლიდირებულ ტენდერში გასამარჯვებელ პირობებს ვერ აკმაყოფილებს. კომპანიას, დღევანდელი მდგომარეობით, არ შეუძლია სატენდერო წინადადების ერთ-ერთი მოთხოვნის, მთელი საქართველოს მასშტაბით მესამე თაობის - 3G-ს უზრუნველყოფა. სატენდერო მოთხოვნების ვერ დაკმაყოფილების შემთხვევაში კომპანიის დისკვალიფიკაციის საკითხი დგება.

სატენდერო წინადადების მიხედვით, გამარჯვებულმა კომპანიამ 2017 წლის 1 თებერვლიდან 2018 წლის 31 იანვრის ჩათვლით 260 ათასი აბონენტისთვის GSM, UMTS, LTE სტანდარტებით მომსახურება უნდა უზრუნველყოს. ქსელის დაფარვის არეალი უნდა იყოს ქვეყნის არანაკლებ 90 პროცენტი და დასახლებული ტერიტორიის არანაკლებ 95 პროცენტი. გარდა ამისა, გამარჯვებულმა კომპანიამ უნდა უზრუნველყოს: 2G/GSM, 3G/UMTS და 4G/LTE ინტერნეტის მომსახურების გაწევა.

ტენდერში მონაწილეობას არ იღებდნენ ბილაინის კონკურენტები - მაგთი და ჯეოსელი. მიზეზებზე მათ პრესსამსახურში კომენტარს ამ ეტაპზე არ აკეთებენ.

სახელმწიფო შესყიდვების სააგენტოს ვებგვერდზე სატელეკომუნიკაციო მომსახურების შესახებ ბოლო 5 წლის განმავლობაში განხორციელებული კონსოლიდირებული ტენდერების ნახვაა შესაძლებელი. ყველა ტენდერში, ბოლოს გარდა, მონაწილეობდნენ მაგთიკომი და ჯეოსელი, იშვიათად კი - ბილაინი. გამარჯვებული 2017 წლამდე ხან ჯეოსელი ხდებოდა და ხან მაგთიკომი.

ბოლო 5 წლის განმავლობაში სატელეკომუნიკაციო მომსახურების კონსოლიდირებულ ტენდერისთვის განაცხადების წარდგენის ყველაზე მცირეპერდიოანი მონაკვეთი 2017 წელს იყო. წელს შეთავაზებების წარდგენა 29 იანვარს დაიწყო და 25 საათში, 30 იანვარს დასრულდა. მანამდე ყველაზე მცირე პერიოდი, რომლის განმავლობაშიც კომპანიებს საკუთარი წინადადებები უნდა წარედგინათ 40 საათი (2014 წელი) იყო.