საქართველო-აზერბაიჯანის საზღვრის დელიმიტაცია-დემარკაციის საქმეზე დაკავებული ივერი მელაშვილის ადვოკატის, ედუარდ მარიკაშვილის განცხადებით, ბიძინა ივანიშვილის მიერ დავით ხიდაშელის შესახებ გაკეთებულმა განცხადებამ უფრო ნათელი გახადა კონტურები იმის შესახებ, რომ საქმე პირადად ივანიშვილის კონტროლზეა და მნიშვნელოვან მიღწევად მიაჩნია

"ბიძინა ივანიშვილმა განაცხადა, რომ დავით ხიდაშელის "გმირობამ" (რუკების რუსეთიდან ჩამოტანა), ქვეყანას ერთი მხრივ აარიდა მეზობელ სახელმწიფოსთან კამათს, ხოლო მეორე მხრივ კულტურული მემკვიდრეობის ძეგლი გადაარჩინა შუაზე გაჭრას.
კიდევ უფრო ნათელი გახდა კონტურები, რომ საქმე პირადად ივანიშვილის კონტროლზეა და მნიშვნელოვან მიღწევად მიაჩნია.
თუმცა, ბუნდოვანია, რას ნიშნავს მეზობელ სახელმწიფოსთან კამათის თავიდან არიდება. რატომ საუბრობს ისე თითქოს, სადავო საკითხი უკვე გადაჭრილია", — წერს მარიკაშვილი ფეისბუქგვერდზე.

ქართული ოცნების ყოფილმა თავმჯდომარემ, ბიძინა ივანიშვილმა 12 იანვარს საზოგადოებრივი მაუწყებლის ეთერში განაცხადა, რომ დავით ხიდაშელი, რომელმაც აზერბაიჯანთან საზღვრის დელიმიტაცია-დემარკაციის საქმის რუკები მოიპოვა, მასზე მეტად ქველმოქმედია.