ქართული ოცნების აწ უკვე ყოფილი თავმჯდომარის განცხადებით, ქველმოქმედებისთვის ქონების გადაცემის შემდეგ მისი და მისი ცოლის, ეკატერინე ხვედელიძის განკარგულებაში 200 მილიონი დოლარი რჩება. ამის შესახებ მან გამოცემა Entrepreneur-თან ინტერვიუში განაცხადა.

როგორც ივანიშვილი ამბობს, ცოლთან ერთად მიიღი გადაწყვეტილება, რომ საქველმოქმედო ფონდ ქართუს გადასცემოდა ყველა მატერიალური აქტივი, რომლებიც საკრედიტო და სხვა სახის ვალდებულებებით არ არის დატვირთული. მისივე თქმით, ქონება ფონდს ერთადერთი პირობით გადაეცა — არც მართვის და არც გასხვისების შემთხვევაში, აქტივებს არ უნდა შეეცვალოს პროფილი.

"სწორედ ეს პროცესი დაიწყო გასული წლის 30-31 დეკემბერს, როდესაც თქვენ მიერ დასახელებული აქტივები გადავიდა ფონდის განკარგულებაში და ეს პროცესი ეტაპ-ეტაპ შეუქცევადად გაგრძელდება. ჩემი და ჩემი მეუღლის განკარგულებაში რჩება 200 მილიონი დოლარი, რომელიც ამ მილიარდ-ნახევრის მიღმა თავისუფალი სახსრების სახით არსებობდა. შვილებს ვუტოვებ იმდენს, რომ მათ არ დაკარგონ ახლის შექმნის, საკუთარი თავის სრულად რეალიზებისა და განვითარების მოტივაცია, რაშიც დივიდენდების იმედად ცხოვრება, შესაძლოა, ხელის შემშლელიც კი ყოფილიყო", — აღნიშნა ივანიშვილმა.

მას მიაჩნია, რომ სჯობს ფონდისთვის გადაცემული აქტივები მალე გასხვისდეს და ბიზნესის ხელში გადავიდეს:

"ცხადია, ეს არ ნიშნავს, რომელიმე აქტივზე დროზე ადრე უარის თქმას და ნაადრევად დაბალ ფასში გასხვისებას – თუ ბიზნესის მხრიდან გაკეთებული შეთავაზება საგრძნობლად დაბალი იქნება მის საბაზრო ფასთან შედარებით, ფონდი გააგრძელებს მის მართვას მანამ, სანამ შესაფერის წინადადებას არ მიიღებს. სასტუმროების შემთხვევაში, შესაძლოა, უკეთესიც იყოს მათი რამდენიმე წლის შემდეგ გასხვისება, რადგან პოლიტიკურ სტაბილურობასთან და ქვეყნის ეკონომიკურ ზრდასთან ერთად მათი ფასიც გაიზრდება".

Bloomberg-ის 12 იანვრის მონაცემებით, ბიძინა ივანიშვილის ქონება 5,72 მილიარდ დოლარად არის შეფასებული. პოლიტიკიდან მეორედ წასვლის განცხადების გავრცელებამდე, მედიაში ვრცელდებოდა ინფორმაცია, რომ ბიძინა ივანიშვილმა ფონდ ქართუსთვის ქონების გადაცემა დაიწყო.

ფონდში აქტივების გადატანა ქართულ ოცნებაში კიდევ ერთ ქველმოქმედებად შეაფასეს. მმართველი გუნდისგან განსხვავებით, ოპოზიციაში მიაჩნიათ, რომ ივანიშვილმა ქონება ერთი კომპანიიდან მეორეში გადაიტანა და ის ისევ მის დაქვემდებარებაში იქნება.

გამოცემა Entrepreneur აქვეყნებს იმ ქონების ჩამონათვალს, რომელიც ბიძინა ივანიშვილმა ფონს გადასცა.

ფოტო: Entrepreneur

ფოტო: Entrepreneur

ფოტო: Entrepreneur

ფოტო: Entrepreneur

ამასთან მასალაში მითითებულია, რომ გადაცემის პროცესშია:

  • კომპლექსი დაბა ბაკურიანში — 7 625 (ქონების ფართი), 88 801 (მიწის ნაკვეთის ფართი);
  • შპს სასტუმრო სიღნაღში — (წილის 70%).