საქალაქო სასამართლომ გიორგი შაქარაშვილის საქმეზე პირველ ეპიზოდში ბრალდებულებს საბა ჩხარტიშვილს, საბა გოგშელიძესა და ირაკლი წაქაძეს პატიმრობა გირაოთი შეუცვალა და ისინი სასამართლო დარბაზიდან გაათავისუფლა. სამ ბრალდებულს პროკურატურა ძალადობასა და ვახტანგ ჩიქოვანისთვის განზრახ მსუბუქი დაზიანებების მიყენებას ედავებოდა.

"დღეს საქალაქო სასამართლომ დააკმაყოფილა დაცვის შუამდგომლობა საბა ჩხარტიშვილის, საბა გოგშელიძისა და ირაკლი წაქაძის მიმართ. დაცვის მხარემ მოითხოვა შეფარდებული პატიმრობის გირაოთი შეცვლა, სასამართლომ იმსჯელა და მიიღო გადაწყვეტილება დაცვის მხარის შუამდგომლობის დაკმაყოფილების თაობაზე", — აღნიშნა ჩხარტიშვილის ადვოკატმა დავით ჭიკაიძემ.

საქმის პროკურორის განცხადებით კი, პროკურატურამ გაითვალისწინა გარემოება, რომ სამივე ბრალდებულმა აღიარა წარდგენილი ბრალი, შესაბამისად, აღარ არსებობდა მოწმეებზე ზემოქმედების საფრთხე, ამიტომ ბრალდების მხარე აღნიშნულ შუამდგომლობს დაეთანხმა.

"რაც შეეხება საპროცესო შეთანხმებას, მინდა ცალსახად განვმარტო, რომ ამ ეტაპზე მხარეებს შორის საპროცესო შეთანხმება არ მიმდინარეობს. აქვე მინდა აღვნიშნო, რომ ამ სამ ბრალდებულს ბრალი ედებათ ძალადობასა და განზრახ მსუბუქი დაზიანების მიყენებაში, რაც გულისხმობს აგარაკზე მომხდარ ინციდენტს და აღნიშნულს არანაირი შეხება არა აქვს შაქარაშვილის გარდაცვალებასთან", — განაცხადა პროკურორმა.

ამასთან, დღეს გიორგი შაქარაშვილის საქმეზე ახალი სამედიცინო ექსპერტიზის დასკვნა გახდა ცნობილი, რომლის თანახმადაც კიდევ ერთხელ დადასტურდა, რომ გიორგი შაქარაშვილი მოკლეს, ხოლო მკვლელობამდე მას ბრალდებულები ფიზიკურად გაუსწორდნენ.

შაქარაშვილის საქმეზე ბრალდებული 11 სრულწლოვანი პირის საქმე ცალკე წარმოებად არის გამოყოფილი. ბრალდებულებს: ვახტანგ ჩიქოვანს, ვასილ მახარაძეს, არჩილ გაგნიძეს, ნიკა რევაზიშვილს, გიგა ტატიაშვილს, თენგიზ ბარბაქაძეს, ნიკა ჟვანიას, ირაკლი მუმლაძეს, საბა ჩხარტიშვილს, ირაკლი წაქაძესა და საბა გოგშელიძეს გამოძიება ედავება ჯგუფური ძალადობის ორგანიზებას, მასში მონაწილეობასა და თავისუფლების უკანონო აღკვეთას.

მათგანს სამს — ვახტანგ ჩიქოვანს, ნიკა რევაზიშვილსა და არჩილ გაგნიძეს, ასევე, 2 არასრულწლოვანს ბრალდებულს ზ.ხ.-სა და ა.ქ.-ს 11 აგვისტოს პროკურატურამ ბრალი დაუმძიმა. გამოძიება მათ დამამძიმებელ გარემოებებში ჩადენილ განზრახ მკვლელობას ედავება. პროკურატურის ვერსიით, მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.