პარლამენტის დეპუტატი, დავით ზილფიმიანი, რომელმაც მანდატი პატრიოტთა ალიანსის სიით მოიპოვა და ახლა ახალ პარტიას, ევროპელ სოციალისტებს აარსებს, ამბობს, რომ ის ევროპისკენ ისწრაფვის და "არადასვლურობის ელემენტებზე" მასთან საუბარი არ შეიძლება. ამასთან, ის ხაზს უსვამს, რომ მისი ოჯახიც ევროპაში ცხოვრობს.

"დღეს არც თავის თავს აკადრებს და არც მე მაკადრებს ჟურნალისტი, რომ არადასავლურობის ელემენტზე მესაუბროს. მთელი ჩემი სიცოცხლე გავატარე ევროპაში, ბოლოს და ბოლოს, ოჯახი და შვილიშვილები მყავს იტალიელები. ცხადია, რომ ჩემი სწრაფვა ევროპისკენ კვლავინდებურად დიდია, საერთოდ დასავლეთისკენ. ჩემმა სამეცნიერო და პედაგოგიურმა მოღვაწეობამ მოიტანა ის, რომ სულ ამ სფეროში ვიყავი, ასევ ვთქვათ, საშუალოზე მაღალ ფენასთან მიწევდა საუბარი", — განაცხადა ზილფიმიანმა.

მისივე მტკიცებით, ევროპელ სოციალისტებს შეუძლიათ აღმოფხვრან უმუშევრობა და "კონსოლიდაცია გაუკეთონ საშუალო ფენას". ზილფიმიანის თქმით, როცა მისი პარტია ხელისუფლებაში მოვა, საქართველო ევროპის ერთ-ერთ საუკეთესო ქვეყანა გახდება.

პრორუსული პარტიის პატრიოტთა ალიანსის ყოფილი წევრების, დავით ზილფიმიანის, ფრიდონ ინჯიასა და გელა მიქაძის სადეპუტატო მანდატები უკვე ცნეს და ისინი პარლამენტში შევიდნენ. როგორც ფრიდონ ინჯიამ შემდეგ განმარტა, პარლამენტში შესვლა იმიტომ გადაწყვიტეს, რომ "ოპონირება" გაეწიათ ქართული ოცნებისთვის. დეპუტატმა მაშინვე განაცხადა, რომ პარლამენტში შესვლასთან ერთად ისინი პატრიოტთა ალიანსს ტოვებენ და ახალ პოლიტიკურ პარტიას ევროპელ სოციალისტებს წარადგენენ.

4 იანვარს პატრიოტთა ალიანსის სიის სამ წევრს — ირმა ინაშვილს, გიორგი ლომიასა და გოჩა თევდორაძეს — პარლამენტმა სადეპუტატო უფლებამოსილება შეუწყვიტა. რაც შეეხება სიის მეოთხე ნომერს, ავთანდილ ენუქიძეს მან მანდატზე უარი არ თქვა და პარლამენტში შევიდა. პატრიოტთა ალიანსის ის დეპუტატები კი, რომელთაც უარი თქვეს მანდატებზე, დავით ზილფიმიანმა, ფრიდონ ინჯიამ და გელა მიქაძემ ჩაანაცვლეს.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.