ვანისა და ბაღდათის მიტროპოლიტ ანტონს კორონავირუსი დაუდასტურდა და ის კლინიკაში მკურნალობს. ინფორმაცია ამის შესახებ On.ge პატრიარქის პირადმა ექიმმა, ცისანა შარტავამ დაუდასტურა.

როგორც შარტავამ განმარტა, იგი მიტროპოლიტის ექიმსაც ესაუბრა. მისი თქმით, მეუფე ანტონი თავს კარგად გრძნობს, ვირუსი მსუბუქად მიმდინარეობს და დამატებითი ჩარევებს არ საჭიროებს.

მიტროპოლიტი ანტონი ერთ-ერთი იყო იმ მღვდელმთავრებს შორის, რომელიც კორონავირუსის პანდემიის დაწყებისას წირვა-ლოცვაზე მრევლის არდაშვებას ეწინააღმდეგებოდა. მას იდეაც გაუჩნდა, რომ აღდგომის წირვა სტადიონზე ჩატარებულიყო, რათა მრევლს დისტანციის დაცვა შეძლებოდა.

ცისანა შარტავას თქმით, მიტროპოლიტს შეხება პატრიარქთან არ ჰქონია, თუმცა მას კონტაქტი ჰქონდა ილია მეორის მდივან-რეფერანტთან, შორენა თეთრუაშვილთან.

შორენა თეთრუაშვილს კორონავირუსი ჯერ არ დადასტურებია და ის თვითზიოლაციაშია. ექიმ ცისანა შარტავას თქმით, ტესტის პასუხს ჯერ ელოდებიან. სამი დღის წინ, შორენა თეთრუაშვილი საპატრიარქოში ილია მეორის დაბადების დღისადმი მიძღვნილ საღამოს დაესწრო. საპატრიარქოს საზოგადოებასთან ურთიერთობის სამსახურის მიერ გავრცელებულ ვიდეოში ილია მეორეს სიახლოვეს მოძრავი შორენა თეთრუაშვილიც ჩანს. ღონისძიებას სტუმრები და მღვდელმთავრები ესწრებოდნენ.