რაჭა-ლეჩხუმის მიმართულებაზე ხანძრის ქრობის სამუშაოებში ვერტმფრენი ჩაერთო. ამაზე ინფორმაციას საგანგებო სიტუაციების მართვის სამსახური ავრცელებს. ვერტმფრენი ონჭევი-წოლას კერის ქრობის სამუშაოებს შეურთდება.

საგანგებო სიტუაციების მართვის სამსახურის ცნობით, რეგიონში აღნიშნულის გარდა, დარჩენილია 2 კერა. ჩქუმში ხანძარი ლოკალიზებულია და მისი სალიკვიდაციო სამუშაოები მიმდინარეობს, ხოლო ლაილაშში ხანძრის ქრობა გრძელდება. ამ ლოკაციებზე ცეცხლი ქვედა საფარს უკიდია.

5 იანვარს გავრცელდა ინფორმაცია, რომ სოფელი ჩქუმის თავზე ტყის ქვედა საფარი იწვის. ცაგერის საგანგებო სიტუაციების მართვის სამსახურის მეხანძრეთა ბრიგადები ცეცხლის ლოკალიზებას ცდილობდნენ, თუმცა, საქმეს ძლიერი ქარი ართულებდა, რაც ცეცხლის გავრცელების საშიშროებას ქმნიდა. ცეცხლი ეკალ-ბარდებს, გამხმარ ფოთლებსა და შერეულ ტყეს გაუჩნდა.