პარლამენტარი დავით ზილფიმიანი, რომელმაც დეპუტატის მანდატი პატრიოტთა ალიანსის საარჩევნო სიის წევრობით მოიპოვა, განმარტავს, რატომ არ ჩახსნა სია პარტიამ. მისი თქმით, პარტიის წევრები ინდივიდები არიან და ლიდერს არ აქვს მორალური უფლება, მათი ნებართვის გარეშე ჩახსნას სია.

"ჩვენს ურთიერთობაში ასეა და მე მგონია, რომ ყველა პარტიაში ასე უნდა იყოს — პარტიაში, როდესაც ადამიანები ერთად იბრძვიან რაღაცისთვის, მათ, ყველას, თავისი შესაძლებლობის ფარგლებში, ერთნაირი ლეპტა აქვთ ამ პარტიის რეიტინგის შეძენაში. ისინი ერთად მუშაობენ. ესენი არიან ინდივიდები, პიროვნებები და არცერთ ლიდერს მათი ნებართვის გარეშე არ უნდა ქონდეს მორალური უფლება, ეს არის გადმონაშთი სააკაშვილის, რომ "ჩავხსენი სია". რას ჰქვია?! ცხვრის ფარაა? რა ჩახსენი? ჯერ უნდა კითხო და ამის შემდეგ უნდა ჩახსნა.

ინაშვილიც და თარხან-მოურავიც ღირსეული ადამიანები არიან და თავის პარტიის წევრებს ცოტა განსხვავებულად ეპყრობიან, ვიდრე სხვა პარტიებში", — განაცხადა დავით ზილფიმიანმა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.

დღეს საქართველოს პარლამენტმა პატრიოტთა ალიანსის სამი ყოფილი წევრის, დავით ზილფიმიანის, ფრიდონ ინჯიასა და გელა მიქაძის სადეპუტატო მანდატები სცნო, ისინი პარლამენტში უკვე შევიდნენ.

გუშინ, 4 იანვარს პატრიოტთა ალიანსის საარჩევნო სიის პირველ სამ წევრს — ირმა ინაშვილს, გიორგი ლომიას და გოჩა თევდორაძეს — პარლამენტმა სადეპუტატო უფლებამოსილება ვადამდე შეუწყვიტა. სწორედ მათ ნაცვლად შევიდნენ მიქაძე, ინჯია და ზილფიმიანი პარლამენტში.

2020 წლის 11 დეკემბერს საქართველოს მე-10 მოწვევის პარლამენტი ერთპარტიულად შეიკრიბა. პირველი სხდომიდან 25-ე დღეს ქართულ ოცნებას პატრიოტთა ალიანსის საარჩევნო სიის წევრი 4 დეპუტატი შეუერთდა.

გაიგეთ მეტი: