საქართველოს პარლამენტის წვერის, დავით ზილფიმიანი საზოგადოებას სთხოვს, პროდასავლურობაზე მასთან შეჯიბრს ნუ მოაწყობენ.

"ჩემი ცხოვრების 35 წელი გავატარე წამყვან სამეცნიერო ცენტრებში. ვმუშაობდი NASA-ში, ევროპის კოსმოსურ სააგენტოებში, ოჯახი მყავს იტალიელები [...] ეს პოლიტიკანური თვისებებია, ისე საუბრობენ თავის კოლეგაზე, ან თუნდაც, უბრალოდ ადამიანზე, რომ მის ან წარსულს, ან ბიოგრაფიას, არც კი სწავლობენ. ეს უნდა დამთავრდეს. იმიტომ, რომ დააკვირდით რა ხდება, დღეს პოლიტიკოსებმა ისწავლეს არგუმენტებად მოსაზრების დადება. ეს მცდარი გზაა. არ შეიძლება არგუმენტი შენ საკუთარ მოსაზრებას ეფუძნებოდეს. არგუმენტი, აუცილებლად, უნდა ფაქტებს ეფუძნებოდეს. ამიტომ, ამ საკითხს მე ვხსნი და არავითარი, პროდასავლურობაზე, გთხოვთ, ჩემთან მაინცდამაინც დიდ შეჯიბრს ნუ მოაწყობს ნურავინ", — განაცხადა დავით ზილფიმიანმა პალიტრანიუსის ეთერში.

ზილფიმიანის თქმით, ის ადამიანები, ვინც მას იცნობს, არც საკუთარ თავს და არც თავად მას არ აკადრებენ პროდასავლურობაზე საუბარს. ზილფიმიანი თვლის, რომ მასთან ამ თემაზე საუბარი უაზრობაა.

"ვინც მიცნობთ და მიცნობენ, ისინი არც თავის თავს აკადრებენ და არც მე მაკადრებენ ჩემთან საერთოდ ჩამოაგდონ ლაპარაკი პროდასავლურობაზე. იმიტომ, რომ მრავალი ახალგაზრდა პოლიტიკოსი, მაშინ როცა დასავლეთში სწავლობდა პროდასავლურობას, მე მაშინ მათ ვასწავლიდი პროდასავლურობას დასავლეთში. არასოდეს გამიჟღერებია ეს ფრაზა და არც ამბიცია მაწუხებს ამის, მაგრამ, ჩემთან ამ თემაზე უაზრობაა ლაპარაკი", — განაცხადა დავით ზილფიმიანმა.

შეგახსენებთ, რომ დავით ზილფიმიანი საპარლამენტო არჩევნებში ღიად პრორუსული პარტიის, პატრიოტთა ალიანსის საარჩევნო სიის მერვე ნომერი იყო. პარტიამ 4 საპარლამენტო მანდატი მოიპოვა, თუმცა, მას შემდეგ, რაც მის წევრთა ნაწილმა საპარლამენტო მანდატებზე უარი თქმა, ზილფიმიანს შესაძლებლობა მიეცა პარლამენტის წვერი გამხდარიყო.

დღეს, 5 იანვარს, პარლამენტმა ზილფიმიანთან ერთად პატრიოტთა ალიანსის ორი ყოფილი წევრის, ფრიდონ ინჯიასა და გელა მიქაძის სადეპუტატო მანდატები სცნო. ისინი პარლამენტში უკვე შევიდნენ. პატრიოტთა ალიანსის სიით, მათთან ერთად პარლამენტის შევიდა ავთანდილ ენუქიძეც.

ქართული ოცნების აღმასრულებელი მდივნის, ირაკლი კობახიძის განცხადებით, მნიშვნელოვანია, რომ პარლამენტში არ შევიდა პატრიოტთა ალიანსის "რუსული შემადგენელი".

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.

გაიგეთ მეტი: