ერთიანი ნაციონალური მოძრაობის პოლიტსაბჭოს წევრის, ლევან ბეჟაშვილის განცხადებით, ქართული ოცნება პატრიოტთა ალიანსის საარჩევნო სიის წევრებისთვის დეპუტატის მანდატის მინიჭებით, ცდილობს პოლიტიკური რეალობის გაყალბებას პარლამენტში.

"ქართულმა ოცნებამ გააყალბა არჩევნები, ახლა ისინი ცდილობენ გააყალბონ პოლიტიკური რეალობა პარლამენტში. პატრიოტთა ალიანსის რამდენიმე ფულიანი დეპუტატის შეყვანით, ბუნებრივია, პოლიტიკური რეალობა არ იცვლება. ეს პარლამენტი იქნება ერთპარტიული", — განაცხადა ლევან ბეჟაშვილმა საზოგადოებრივი მაუწყებლის ეთერში.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.

დღეს საქართველოს პარლამენტმა პატრიოტთა ალიანსის სამი ყოფილი წევრის, დავით ზილფიმიანის, ფრიდონ ინჯიასა და გელა მიქაძის სადეპუტატო მანდატები სცნო, ისინი პარლამენტში უკვე შევიდნენ.

გუშინ, 4 იანვარს პატრიოტთა ალიანსის საარჩევნო სიის პირველ სამ წევრს — ირმა ინაშვილს, გიორგი ლომიას და გოჩა თევდორაძეს — პარლამენტმა სადეპუტატო უფლებამოსილება ვადამდე შეუწყვიტა. სწორედ მათ ნაცვლად შევიდნენ მიქაძე, ინჯია და ზილფიმიანი პარლამენტში.

2020 წლის 11 დეკემბერს საქართველოს მე-10 მოწვევის პარლამენტი ერთპარტიულად შეიკრიბა. პირველი სხდომიდან 25-ე დღეს ქართულ ოცნებას პატრიოტთა ალიანსის საარჩევნო სიის წევრი 4 დეპუტატი შეუერთდა.

გაიგეთ მეტი: