პოლიციის განცხადებით, კანადის ქალაქ კვებეკში მეჩეთის მიმართ სროლის შედეგად ექვსი ადამიანი დაიღუპა, ხოლო რვა დაჭრილი საავადმყოფოშია გადაყვანილი. ინფორმაციას BBC ავრცელებს.

კვირას, 29 იანვარს, კვებეკის ისლამისტურ კულტურულ ცენტრს ცეცხლი მაშინ გაუხსნეს, როდესაც ადგილზე სალოცავად 50-ზე მეტი ადამიანი იყო შეკრებილი.

პოლიციის თქმით, დანაშაულში ეჭვმიტანილი ორივე პირი დაკავებულია, ერთი მათგანი დანაშაულის ადგილას დააკავეს, ხოლო მეორე მაშინ დააკავეს, როდესაც ის მიმალვას ცდილობდა. სამართალდამცავების მტკიცებით ამ დანაშაულში მეტი ადამიანი არ ფიგურირებს.

კანადის ხელისუფლება მომხდარს ტერორისტულ თავდასხმად აფასებს.

"კანადელი მუსლიმანები ჩვენი ნაციონალური სტრუქტურის მნიშვნელოვანი ნაწილნი არიან და ჩვენს ქალაქებში და ქვეყანაში ასეთ ქმედებებს ადგილი არ უნდა ჰქონდეს" - აცხადებს პრემიერმინისტრი ჯასტინ ტრიუდო.

დაღუპულების ასაკი საშუალოდ 35-დან 70 წლამდე მერყეობს. ადგილობრივი პოლიციელის განცხადებით, დაშავებულებიდან რამდენიმეს მდგომარეობა ძალიან მძიმეა.

მას შემდეგ რაც პოლიციამ სიტუაციაზე კონტროლი მოიპოვა, 39-მა ადამიანმა მეჩეთი უსაფრთხოდ დატოვა.