ჰელფების შესახებ უკვე გიამბეთ — ინიციატივას მოქალაქეების გუნდი ახორციელებს და ისინი პანდემიის დროს ოჯახებს და შემოსავლის გარეშე დარჩენილ ადამიანებს ეხმარებიან. ყველაფერი გიგა მაქარაშვილის ერთი პოსტით, ნოემბერში დაიწყო და რამდენიმე დღეში მას ასეულობით ადამიანი გამოეხმაურა. საქმეში მისი თანამებრძოლები, #სირცხვილიას აქტივისტები ჩაერთვნენ, რომლებიც ჰელფებად, ანუ ჰუმანიტარულ ელფებად იქცნენ.

ახლა, როცა 2021 წელია და კარგ ამბებს გაშლილი გულით ველით, გიგა მაქარაშვილმა 29 ნოემბრის ამბავი გაიხსენა. მისი სიტყვებით, შემოდგომის მიწურულს ერთმა ქალმა მისწერა, რომელმაც გაუმხილა, რომ 13 წელი შვილზე ოცნებობდა და მისთვის ყველაფერი წინასწარ ჰქონდა შეძენილი — მათ შორის ბავშვის ახალთ-ახალი საწოლი. თუმცა, გადაწყვიტა, რომ ჰელფების ინიციატივას შეერთებოდა და საწოლი მისთვის გაეგზავნა, ვისაც ის ახლა მასზე მეტად სჭირდებოდა.

თუმცა, ამბავი ასე არ სრულდება. ამ პატარა კეთილი საქმის შემდეგ, 2021 წელი იმედიანად დაიწყო:

"ახლა მწერს ორსულად ვარო და გადავწყვიტე პატარა რომ გაჩნდება, საწოლი ჰელფების სახელით ვუყიდო", — წერს გიგა მაქარაშვილი.