ინგლისში კორონავირუსის შემთხვევების ზრდის გამო საყოველთაო კარანტინი გამოცხადდა. ამის შესახებ დღეს ქვეყნის პრემიერმინისტრმა, ბორის ჯონსონმა ისაუბრა. მისი განცხადებით, სახლის დატოვება მხოლოდ გამონაკლის შემთხვევებში იქნება შესაძლებელი.

ჯონსონის თქმით, კარანტინი თებერვლის შუა რიცხვებამდე გაგრძელდება, შესაბამისად, სკოლები, კოლეჯები და უმაღლესი სასწავლებლები დისტანციური სწავლების რეჟიმზე გადავლენ. მისივე განცხადებით, გამომდინარე იქედან, რომ კორონავირუსის შემთხვევებმა ქვეყანაში მოიმატა და ამ ყველაფერს მისი ახალი შტამის სწრაფი გავრცელება დაემატა, მკაცრი შეზღუდვების დაწესების აუცილებლობა დადგა.

14 დეკემბერს ინგლისში კორონავირუსის ახალი ვარიანტი დააფიქსირეს. ჯანდაცვის სფეროს წარმომადგენლები აცხადებენ, რომ კორონავირუსის ახალი შტამი 70%-ით უფრო გადამდებია, მაგრამ არაა დამტკიცებული არის თუ არა უფრო მომაკვდინებელი. რამდენიმე ქვეყანამ კორონავირუსის მუტაციური ვარიანტის გამო ბრიტანეთთან საჰაერო მიმოსვლა შეაჩერა.

21 დეკემბერს კი, საქართველოში ბრიტანეთიდან შემოსული, ან ბოლო 2 კვირაში ბრიტანეთში ნამყოფი პირებისთვის სავალდებულო კარანტინი დაწესდა. ამასთან, 4 იანვარს საქართველოში კორონავირუსის ახალი შტამის ე.წ. ბრიტანული ვარიანტის ერთი შემთხვევა დადასტურდა.