ქართული ოცნების დეპუტატის, გია ვოლსკის განცხადებით, პატრიოტთა ალიანსის სამი წევრისთვის მანდატების ვადამდე გაუქმება არანაირ "დასჯას" არ ემსახურება. მისი თქმით, პარტიამ სასჯელი მაშინ გამოუტანა საკუთარ თავს, როდესაც "დესტრუქციულ რეჟიმში" შევიდა.

"არანაირი პროცედურული დარღვევა არ ყოფილა, მე საერთოდ არ მესმის რა პრეტენზია აქვთ. შემოვიდნენ, გაუქმება ითხოვეს და მიიღეს ის, რაც ითხოვეს. სია არ გაუუქმებიათ, შესაბამისად, შემდეგი სიაში ვინც არის, იმათ შემოსვლის ლეგიტიმური უფლება აქვთ. არაადეკვატურია დასჯაზე საუბარი ამ სიტუაციაში, არის პროცედურული საკითხები და მივყვებით მას. სასჯელი მაშინ გამოუტანეს თავის თავს, როცა დესტრუქციულ რეჟიმში შემოვიდნენ", — განაცხადა მან.

დღეს პატრიოტთა ალიანსს პარლამენტმა სადეპუტატო უფლებამოსილება ვადამდე შეუწყვიტა. მანდატები გაუუქმდა პარტიის სამ წევრს — ირმა ინაშვილს, გიორგი ლომიას და გოჩა თევდორაძეს. რაც შეეხება პატრიოტთა ალიანსის სიის მე-4 ნომერს, ავთანდილ ენუქიძეს იგი საპარლამენტო მანდატზე უარს არ ამბობს. ამასთან, პატრიოტთა ალიანსის პარტიული სიის რიგით მე-8 ნომერმა, დავით ზილფიმიანმა განაცხადა, რომ იგი შესაძლოა პარლამენტში შევიდეს.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.