ამერიკის ელჩმა საქართველოში, კელი დეგნანმა საქართველოს ახალი წელი მიულოცა, 2020 წელი შეაჯამა და აღნიშნა, რომ 2020 წლის გამოწვევებმა საქართველოში მნიშვნელოვანი საქმის გაგრძელებას ხელი ვერ შეუშალა.

" ეს წელი მსოფლიოში ბევრი ადამიანისთვის რთული იყო, გაურკვევლობის, ცვლილებებისა და ძალიან დიდი დანაკარგის გამო. ასეთ დროს ვაცნობიერებთ, თუ რამდენად ძვირფასია ჩვენი ოჯახი, მეგობრები და კოლეგები და რამდენად ვაფასებთ ერთად გატარებულ დროს.

ჩემზე საოცარი შთაბეჭდილება მოახდინა იმან, თუ რამდენი რამის წარმატებით შესრულება შეგვიძლია ერთად მუშაობით.

კოვიდი ვერ შეგვიშლის ხელს! პანდემიის დაწყებისთანავე მთელი ჩვენი გუნდი ვირუსის წინააღმდეგ ბრძოლაში საქართველოს დასახმარებლად გაერთიანდა. თქვენმა საქმემ, პირდაპირი მნიშვნელობით, გადაარჩინა ადამიანების სიცოცხლე. ამერიკელებმა და ქართველებმა აჩვენეს, რომ ჩვენ შეგვიძლია და ერთად ვიდგებით, მიუხედავად გამოწვევებისა.

სხვათა შორის, ამ კარგმა საქმემ მათი ყურადღებაც მიიპყრო, ვინც საქართველოში ადრე მსახურობდა. მომწერეს ელექტრონული ფოსტით, დამიტოვეს შეტყობინებები და გამომიგზავნეს ვიდეოები,რათა გაეზიარებინათ მოგონებები მათი არაჩვეულებრივ მეგობრებისა და საქართველოს შესახებ, თუ რა ენატრებათ ყველაზე მეტად და როგორ გისურვებენ უსაფრთხო და წარმატებულ ახალ წელს საუკეთესო სურვილებით", — აღნიშნავს კელი დეგნანი საკუთარ მილოცვაში.

საახალწლო მილოცვა გაავრცელა, ასევე, ევროკავშირის ელჩმა, კარლ ჰარცელმა, რომელმაც, გარდა მილოცვისა, ცოლთან ერთად იაკობ ბობოხიძის მუსიკა "ფიფქები" შეასრულა.