ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა, რომ ამნისტია ვერ იქნება სრულფასოვანი ინსტრუმენტი. ამის შესახებ მან პლენარულ სხდომაზე ისაუბრა.

"ამნისტია ვერ იქნება სრულფასოვანი ინსტრუმენტი, რომ ყველას ინდივიდუალური, სამართლიანი გადაწყვეტა მოეძებნოს. ჩვენ მოგვიწევს, ვიმსჯელოთ, კონკრეტული მუხლის გავრცელების შესაძლებლობაზე. შესაძლოა, გარკვეული გამონაკლისების დაწესებაც, მაგრამ ეს საკმაოდ რთულია. ამაში მოყვება, ბუნებრივია, ყველა კატეგორია, რომელიც ამ კონკრეტული მუხლით არის მსჯავრდებული. მიუხედავად ამისა, ალბათ, უნდა ვიფიქროთ იმაზეც, რომ მომავალში, მაგალითად, ნარკოდანაშულებთან მიმართებით, იგივე დოზირების საკითხები და სხვა მსგავსი საკითხები, ალბათ, კარგი იქნება, თუ პარლამენტის მხრიდან ყურადღების საკითხი გახდება", — განაცხადა მიხეილ სარჯველაძემ.

2 კვირის წინ პარლამენტში დააინიცირეს საქართველოს კანონის პროექტი ამნისტიის შესახებ, რომლის მიხედვითაც ამინისტია შეეხება სულ 44 მუხლით გათვალისწინებულ დანაშაულს. ამ დროისთვის კანონპროექტი არ მოიცავს ისეთ მძიმე მუხლებს, როგორიცაა მკვლელობა, ოჯახში ძალადობა და ასე შემდეგ.

ასევე, კანონპროექტი ითვალისწინებს იმ პირთა განთავისუფლებას სისხლის სამართლის პასუხისმგებლობისგან და შესაბამისი სასჯელისგან, რომელთაც 2020 წლის 11 დეკემბრამდე ჩაიდინეს ამ კანონპროექტით გათვალისწინებული ცალკეული დანაშაული.