სასჯელაღსრულების გლდანის მე-8 დაწესებულების პატიმრების ნაწილი შიმშილობას აგრძელებს ამნისტიის შესახებ კანონში არსებული ხარვეზების გამოსწორების მოთხოვნით.

სასჯელაღსრულების სამინისტროს პრესსამსახურის თქმით, ამჟამად უვადო პატიმრობაში მყოფი 42 მსჯავრდებული შიმშილობს:

"უვადო მსჯავრდებულები სასჯელის შემსუბუქებასა და 2012 წელს მიღებულ იმ კანონში ხარვეზების გასწორებას ითხოვენ, რომელიც ამნისტიას ეხება".

საქმე ეხება "ამნისტიის შესახებ" კანონის იმ ნაწილს, რომლის მიხედვითაც უვადო პატიმრებს ამნისტია არ ეხებათ. პატიმრები მსჯავრის 1/4-ით შემცირებას მოითხოვენ.

პატიმრებმა შიმშილობა 18 მაისს, დილით, დაიწყეს. მათი რაოდენობა თავდაპირველად 45 იყო, თუმცა დღის განმავლობაში 3-მა მათაგნმა შიმშილობა შეწყვიტა.