სტრატეგია აღმაშენებლის ერთ-ერთი ლიდერის, თაკო ჩრკვიანის თქმით, ხელისუფლებასთან დაახლოებულ პირებთან 3 შეხვედრა ჰქონდა, საიდანაც 2 შეხვედრის დროს კორუფციული შეთავაზება გაჟღერდა.

"იყო ხელისუფლებასთან ძალიან დაახლოებული პირები, იყო სულ 3 შეხვედრა, აქედან 1 მართლა, უბრალოდ, ჩავთვალე, რომ ადამიანურად, ჟარგონით რომ ვთქვა, გვაბამდნენ. ღიმილის მომგვრელი იყო. ამდენი ხმაა საჭირო და თუ ბრძოლა გინდათ, იქიდან ვიბრძოლოთ და ძალიან ასეთი კონსტრუქციული საუბარი და მეორე-მესამე უკვე კონკრეტული იყო და იყო პირდაპირი მნიშვნელობით კორუფციული შემოთავაზება", — განაცხადა თაკო ჩარკვიანმა რუსთავი 2-ის ეთერში.

ჩარკვიანის თქმით, მისი ქმრის ბიზნესს 8 წლის განმავლობაში ბლოკავდნენ, ახლა კი ყველაფრის მწყობრში ჩადგომას შეპირდნენ პარლამენტში შესვლის შემთხვევაში.

"ბიზნესზე როცა არის საუბარი, დიდ ბიზნესზე, და როდესაც შენ ყველაფერს გიბლოკავენ ამ 8 წლის განმავლობაში, რაზეც არასდროს არ მისაუბრია[...] როდესაც ძალიან წესიერ და ნორმალურ ბიზნესმენს აყენებენ ასეთ მდგომარეობაში, კუთხეში და მერე მოგაკითხავენ, 8 წლის თავზე და გეტყვიან, რომ ყველაფერი მწყობრში ჩადგება, ოღონდ შედით პარლამენტში", — განაცხადა ჩარკვიანმა.

მისი თქმით, აღნიშნულ პირებთან ბოლო შეხვედრა დაახლოებით 10 დღის წინ იყო.