28 და 29 იანვარს, ტექნოპარკში, მონაცემთა ვიზუალიზაციის ჰაკათონი, Vizhack გაიმართა, სადაც ერთ-ერთი გამარჯვებული, CRRC-ის კვლევის მონაცემების ვიზუალიზაციის შექმნისთვის, On.ge-ის გუნდი გახდა.

Vizhack-ში სულ 14-მა გუნდა მიიღო მონაწილეობა. საპრიზო ფონდი, 6 ათასი ლარი ორ გუნდზე გადანაწილდა. On.ge დაჯილდოვდა 4 ათასი ლარით, ხოლო რეგიონულ მაუწყებელთა ასოციაციის (გარბი) გუნდს 2 ათასი ლარი გადასცეს.

ორი დღის განმავლობაში, მონაწილეები საზოგადოებისთვის მონაცემების მარტივი და საინტერესო ფორმით მიწოდებაზე მუშაობდნენ. პროექტის მიზანია მონაცემების ვიზუალიზაციაზე მომუშავე ადამიანების რაოდენობის გაზრდა და მომავალი პარტნიორული კავშირების შექმნა.

Vizhack-ში მონაწილეობა შეეძლო ყველას, ვისაც მონაცემების ვიზუალიზაცია აინტერესებს და არის დიზაინერი, პროგრამისტი, კომუნიკაციის სპეციალისტი, მკვლევარი ან სტატისტიკოსი.

ღონისძიებას ორგანიზება მარიამ გამხარაშვილმა, ნინო მაჭარაშვილმა, გვანცა კობერიძემ და სანდრო დოლუამ გაუწიეს. Vizhack აშშ-ის სახელმწიფო დეპარტამენტის (ამერიკული საბჭოების FLEX-ის კურსდამთავრებულთა პროგრამის), საქართველოს ინოვაციებისა და ტექნოლოგიების სააგენტოს, ჯამპსტარტ ჯორჯიას და თი-ბი-სი ბანკის მხარდაჭერით მოეწყო.

CRRC-ის მონაცემების ვიზუალიზაციის დასრულებულ ვერსიას On.ge რამდენიმე დღეში შემოგთავაზებთ.