ლეიბორისტული პარტიის ლიდერის, შალვა ნათელაშვილის განცხადებით, პარტია ლელოს ლიდერი, მამუკა ხაზარაძე არა ბანკში, არამედ უკვე პოლიტიკაშია, ამიტომ საკითხებს "პოლიტიკურად უნდა მიუდგეს". ასე ეხმაურება იგი ხაზარაძის განცხადებას, რომ რიგგარეშე არჩევნები შესაძლოა 2022 წელსაც დაინიშნოს სრულად პროპორციული წესით.

"ნუ გაგიკვირდებათ, რომ სხვადასხვა მოსაზრება გამოთქვან, თუმცა არჩევნები უნდა ჩატარდეს სასწრაფოდ, რადგან ქვეყანას არ ჰყავს ორგანო, რომელიც მიიღებს გადაწყვეტილებას და ექნება ქვორუმი უმნიშვნელოვანეს საკითხებზე. არჩევნები უნდა ჩატარდეს ივნისამდე. ხაზარაძეს დიდ პატივს ვცემ, მაგრამ მან უნდა გაითვალისწინოს, რომ ის ბანკში არ არის, ის უკვე პოლიტიკაშია და პოლიტიკურად უნდა მიუდგეს საკითხებს. 2022-ში არჩევნების გადატანა და მით უფრო, ამის მოთხოვნა, ნიშნავს იმას, რომ ბიძინა ივანიშვილს ვაცხადებთ უგვირგვინო იმპერატორად", — განაცხადა ნათელაშვილმა.

მამუკა ხაზარაძემ გუშინ მთავარი არხის ეთერში განაცხადა, რომ რიგგარეშე არჩევნები შესაძლოა 2022 წელსაც დაინიშნოს სრულად პროპორციული წესით და დაიწყოს ახალი 4 წლის ათვლა. აქამდე ოპოზიციის საერთო პოზიცია იყო, რომ რიგგარეშე არჩევნები რაც შეიძლება მალე, 2021 წლის ზაფხულამდე ჩანიშნულიყო. ერთ-ერთი ეს მოთხოვნა წაუყენეს მათ მმართველ გუნდს მოლაპარაკებების მაგიდაზე.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.