საქართველოს ერთპარტიულმა პარლამენტმა საგარეო პოლიტიკის შესახებ რეზოლუციის პროექტი ერთი მოსმენით დაამტკიცა. რეზოლუციის პროექტს 81 მომხრე და არცერთი წინააღმდეგი ჰყავდა.

რეზოლუციაში ჩაიწერა, რომ საქართველოს უმთავრეს საგარეო-პოლიტიკურ ამოცანას დეოკუპაცია და დევნილთა დაბრუნება წარმოადგენს. პროექტი 16 პუნქტისგან შედგება. ერთ-ერთი გულისხმობს, რომ საქართველო გააგრძელებს რუსეთის ფედერაციის წინააღმდეგ წარმოებულ საერთაშორისო დავას, მასზე აქტიურ მუშაობას, სანამ საბოლოო წარმატება არ მიიღწევა. ცალკე მუხლად ჩამოყალიბდა მეგობარ ევროპულ ქვეყნებთან და სტრატეგიულ პარტნიორებთან თანამშრომლობის განმტკიცების შესახებ ჩანაწერი. მესამე პუნქტი ამბობს, რომ NATO ქვეყნისთვის უალტერნატივო სივრცეა და ხელისუფლებას ავალებს, ქვეყანა მასში გასაწევრიანებლად მოამზადოს.

რაც შეეხება დანარჩენ პუნქტებს, პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ ისინი მოკლედ განიხილა:

• აშშ-სთან გვაქვს სტრატეგიული პარტნიორობის ქარტია. სწორედ ამ ქარტიის სრულად ამოქმედებასა და გაღრმავებას ავალებს რეზოლუცია ხელისუფლებას. მათ შორის, აშშ-ს მეტ ჩართულობას შავი ზღვის უსაფრთხოების საკითხებში. გარდა სხვა საკითხებისა, პრიორიტეტული მიმართულებაა ქვეყანაში ამერიკული ინვესტიციების ზრდა;
• პრიორიტეტულია, აგრეთვე, სამხრეთ კავკასიისა და შავი ზღვის რეგიონი. მომდევნო 4 წლის განმავლობაში თურქეთთან, აზერბაიჯანთან და სომხეთთან ურთიერთობის გაღრმავება იქნება პრიორიტეტი;

რაც შეეხება ჩვენს მთავარ გამოწვევა, რუსეთის ფედერაციასთან ურთიერთობას — საქართველო გააგრძელებს რუსეთთან პრაგმატული და პრინციპული პოლიტიკის წარმოებას. ამ პოლიტიკის ნომერ პირველი ამოცანა არის ოკუპაციის დასრულება და რეგიონში უსაფრთხოებისა და სტაბილურობის განმტკიცება", — განაცხადა სამხარაძემ.

მან, აგრეთვე, აღმოსავლეთის ქვეყნებთან ურთიერთობის გაღრმავების მნიშვნელობაზე ისაუბრა.

სამხარაძემ აღნიშნა ისიც, რომ პარლამენტი, როგორც ორგანო, რომელიც განსაზღვრავს საგარეო პოლიტიკის ძირითად მიმართულებებს, გამოიყენებს რეგლამენტით მინიჭებულ ახალ ბერკეტებს და ეფექტიან ზედამხედველობას გაუწევს მთავრობას იმისთვის, რომ ეს გეგმები, რომლებიც დასახულია რეზოლუციაში, მომავალი 4 წლის განმავლობაში შესრულდეს.

24 დეკემბერს მე-10 მოწვევის ერთპარტიული პარლამენტის რიგგარეშე სესიის პლენარული სხდომა გაიმართა, სადაც პრემიერმინისტრობის კანდიდატმა, გიორგი გახარიამ მომავალი მთავრობის პროგრამა წარადგინა. ასევე, გუშინ დამტკიცდა მინისტრთა კაბინეტი, რომლის ყველა წარმომადგენელი ქართული ოცნების წევრია.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.