25 დეკემბერია, ასე რომ კევინ სპეისიმ უკვე მესამედ გამოაქვეყნა თავისი ვიდეო. მას შემდეგ, რაც 2017 წელს სექსუალურ შევიწროებაში 10-მდე კაცმა დაადანაშაულა, სპეისი ყოველ 25 დეკემბერს პირად ვიდეოებს იღებს და ყველას ულოცავს შობას.

ამჯერად, 2-გზის ოსკაროსანი მსახიობის მილოცვა მათ ეხება, ვისთვისაც 2020 არც ისე მარტივი იყო. ანუ, მთელ მსოფლიოს.

"როგორი იქნებოდა შობა ჩემი მილოცვის გარეშე?" — ამბობს ვიდეოს დასაწყისში სპეისი. მას სხვა ადამიანი უღებს და პირველ წამებში, თითქოს, House Of Cards-ის ფრენკ ანდერვუდს ასახიერებს, თუმცა მსახიობი მოულოდნელად დგება, კამერას ართმევს და მონოლოგს იწყებს:

"უამრავი ადამიანი მწერდა და მიყვებოდა თავის პრობლემებს და ისტორიებს და მათი მხოლოდ იმიტომ მესმოდა, რომ მეც მაქვს ჩემი რთული პერიოდები. მიხარია, რომ ამ ადამიანების მხარდაჭერა შემიძლია, მაგრამ მათი დახმარება ჩემს შესაძლებლობებს სცდება. ეს სიტუაციები ჩემზე უფრო დიდია".

ამის შემდეგ, სპეისიმ ისაუბრა მათზე, ვინც პრობლემებისგან თავის დაღწევის გზად სუიციდს მიიჩნევს და მოუწოდა მათ, რომ ეს ნაბიჯი არ გადაედგათ:

"გპირდებით, რომ არსებობს გამოსავალი და სიტუაცია უმჯობესდება. არსებობენ ადამიანები, ვისაც თქვენი გაგება შეუძლია და ისინიც, ვისაც დახმარება შეუძლია. მარტო არ ხართ".

ვიდეო ამერიკის სუიციდის პრევენციის ცხელი ხაზის ნომრით სრულდება.

სპეისი სექსუალურ შევიწროებაში პირველად 2017 წელს, მსახიობმა ენტონი რეპმა დაადანაშაულა. რეპის თქმით, შემთხვევა 1986 წელს მოხდა, როცა თავად 14 წლის იყო და სპეისი 26-ის ან 27-ის. მაშინ სპეისიმ განაცხადა, რომ შემთხვევა არ ახსოვდა, თუმცა ბოდიში მოიხადა. თუმცა, ამბავი ამით არ დასრულებულა — სპეისი კიდევ რამდენიმე ადამიანმა დაადანაშაულა სექსუალურ შევიწროებაში, მათ შორის ერთი მასაჟისტი იყო.

სპეისი House of Cards-დან გაათავისუფლეს, მასთან კონტაქტი უამრავმა კომპანიამ გაწყვიტა. მსახიობის წინააღმდეგ გამოძიება ლონდონისა და ლოს-ანჯელესის პროკურატურამ დაიწყო. 2019 წელს, LA-ში სპეისის წინააღმდეგ გამოძიება შეწყდა, რადგან მისი მბრალდებელი გარდაიცვალა. სპეისის წინააღმდეგ გამოძიება შეწყდა კიდევ რამდენიმე საქმეზე — ერთ შემთხვევაში მბრალდებელმა სარჩელი საკუთარი სურვილით გამოიტანა.

ასევე იხილეთ: