ერთიანი ნაციონალური მოძრაობა უახლოეს დღეებში ინტერპოლს წერილით მიმართავს და მოითხოვს, რომ ქართველი სამხედროების წინაღმდეგ არ გამოცხადდეს ძებნა.

ამის შესახებ დღეს გამართულ ბრიფინგზე ზაზა ბიბილაშვილმა განაცხადა და თქვა, რომ ყველა მსგავსი შემთხვევა პოლიტიკურია და ინტერპოლის კონსტიტუციას ეწინააღმდეგება.

პარტია პარლამენტში გია ცერცვაძის საკითხთან დაკავშირებით საგამოძიებო კომისიის შექმნის ინიციატივითაც გამოდის და მთავრობისგან იმ სამხედროების ვინაობის გასაჯაროებას ითხოვს, რომელთა მონაცემებიც რუსეთს გადაეცა.

ზაზა ბიბილაშვილის თქმით, ერთიანი ნაციონალური მოძრაობის აქტიურობის გარეშე, გია ცერცვაძე ციხეში დარჩებოდა, რადგან მისი თქმით, ის საქართველოს ხელისუფლებას "განწირული ჰყავდა სასიკვდილო განაჩენისთვის".

ბიბილაშვილმა უკრაინის ხელისუფლებას მადლობა გადაუხადა, რომ თავისი მეომარი მტერ სახელმწიფოს არ გადასცა.

უკრაინის გენერალურმა პროკურატურამ ქართველი ჯარისკაცი გია ცერცვაძე საპატიმროდან 26 იანვარს გაათავისუფლა. მოგვიანებით მან განაცხადა, რომ რუსეთს სურს აიყვანოს ისინი, ვისაც ინფორმაცია აქვს საქართველოს უსაფრთხოებაზე.

პრემიერმინისტრმა გიორგი კვირიკაშვილი ერთიანი ნაციონალური მოძრაობა ბრალდებების გამო გააკრიტიკა.