ქართული ოცნების აღმასრულებელმა მდივანმა, ირაკლი კობახიძემ დღეს გამართულ პარლამენტის რიგგარეშე სესიის პლენარულ სხდომაზე, სადაც მინისტრთა კაბინეტი დაამტკიცეს, ცინიკურად ისაუბრა ოპოზიციაზე.

როგორ ახასიათებს ირაკლი კობახიძე თითოეულ ოპოზიციონერს

— პარლამენტში არსებულ დღევანდელ სურათს დააკლდა ოპოზიცია. ძალიან დაგვაკლდა გიგა ბოკერიას და მისი სამპროცენტიანი პარტიის ფასდაუდებელი რჩევები საპენსიო რეფორმის გაუქმებასთან და კატასტროფული საბიუჯეტო დეფიციტის წარმოქმნასთან დაკავშირებით;

— ძალიან დაგვაკლდა სალომე სამადაშვილი, რომელსაც ღრმად სწამს, რომ სწორედ ქართული ოცნებაა ჭეშმარიტად პროდასავლური პარტია, ნაციონალური მოძრაობა კი მიხეილს სააკაშვილისა და გუბაზ სანიკიძის ჭაობშია ჩარჩენილი, თუმცა, ამ დარბაზში ის მაინც ჩვეული დამაჯერებლობით დაიწყებდა იმის მტკიცებას, რომ ხელისუფლება ქვეყანას ჩრდილოეთისკენ მიაქანებს;

— ძალიან დაგვაკლდა რუსეთის საერთაშორისო უსაფრთხოების სპეციალისტი, ელენე ხოშტარიას მიერ სხდომათა დარბაზში აჟღერებული რუსეთის ჰიმნი;

— პარლამენტში ძალიან დაგვაკლდა რუსულად ნამღერი თბილისო;

— ძალიან დაგვაკლდა პატრიოტთა ალიანსის პოლიტიკური შემადგენლობის პრორუსული პროპაგანდა;

— ძალიან დაგვაკლდა გიორგი ვაშაძე-აღმაშენებლის მიერ პლენარულ სხდომათა დარბაზში ჩატარებული სწრაფი კოვიდ-ტესტი;

— ძალიან დაგვაკლდა პროსტიტუციისა და ნარკომანიის პროპაგანდა ზურაბ გირჩი ჯაფარიძის შესრულებით;

— ძალიან დაგვაკლდა ნიკანორ მელიას ვაჟკაცური, ბრჭყალებში, რა თქმა უნდა, პროვოკაციები;

— ძალიან დაგვაკლდა სხდომათა დარბაზში მოსხმული ტოქსიკური სითხე;

— ძალიან დაგვაკლდა ნატო ჩხეიძე და ნიკა მაჭუტაძე. უბრალოდ, დაგვაკლდა;

— ძალიან დაგვაკლდა შალვა ნათელაშვილის კომპეტენცია და პატიოსნება;

—– ძალიან დაგვაკლდა სულხან სიბაშვილი, გიორგი ვადაბრელიძე და დავით ხაჯიშვილი. ესენი რას გაგვიკეთებდნენ? — ფაქტია, რომ დაგვაკლდა.

კობახიძემ აღნიშნა ისიც, რომ ოპოზიცია პარლამენტს ყველა შემთხვევაში აკლია, ისეთიც კი, როგორიც ის არის.

დღეს მე-10 მოწვევის ერთპარტიული პარლამენტის რიგგარეშე სესიის პლენარული სხდომა გაიმართა, სადაც პრემიერმინისტრობის კანდიდატმა, გიორგი გახარიამ მომავალი მთავრობის პროგრამა წარადგინა. ასევე, დღეს დამტკიცდა მინისტრთა კაბინეტი, რომლის ყველა წარმომადგენელი ქართული ოცნების წევრია.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.