გარემოს დაცვისა და სოფლის მეურნეობის მინისტრობის კანდიდატის, ლევან დავითაშვილის განცხადებით, შეზღუდვების დროებითი მოხსნა მხოლოდ სავაჭრო მოლებს იმიტომ შეეხოთ, რომ ბაზრობებზე პანდემიიდან გამომდინარე არსებული რეგულაციების დაცვა გაჭირდებოდა.

"ჩვენთვის ძალიან მძიმეა გადაწყვეტილება, რომელიც შეზღუდვებს უკავშირდება. გვესმის, რომ აქ სოციალური სამართლიანობის დაცვა არის ძალიან მნიშვნელოვანი. ზუსტად იმის გამო, რომ ჩვენთვის პრიორიტეტი არის ადამიანის ჯანმრთელობა და სიცოცხლე, ჩვენი გადაწყვეტილება ეყრდნობა ეპიდემიოლოგების რჩევებს — იქ, სადაც მეტად შესაძლებელი იქნებოდა წესრიგის დაცვა, სანიტარული ნორმების დაცვა და რიგების კონტროლი და ეს პასუხისმგებლობა განესაზღვრათ მოლებს, აქ აღსრულების მეტი სივრცე არსებობს. გვესმის, რომ ბაზრობები ზიანდებიან, ზუსტად ესეც იყო მეორე დახმარების პაკეტის ნაწილი, რომ ბაზრობებზე მომუშავე ადამიანების სოციალურ კომპენსირებას ვითვალისწინებთ. გვესმის, რომ ამ ადამიანების ვაზიანებთ, მაგრამ გადაწყვეტილებები ეყრდნობა ეპიდემიოლოგების რჩევებს", — განაცხადა ლევან დავითაშვილმა.

კორონავირუსული პანდემიის გამო, ქვეყანაში სხვადასხვა შეზღუდვები მოქმედებს.

24 დეკემბრიდან ძალაში რჩება მუნიციპალური ტრანსპორტის შეზღუდვა დიდ ქალაქებში — თბილისში, ბათუმში, ქუთაისში, რუსთავში, გორში, ფოთში, ზუგდიდსა და თელავში. ასევე, შეზღუდვები რჩება საქალაქთაშორისო ტრანსპორტთან დაკავშირებით. არ გაიხსნება ბაზრობები და იმუშავებენ მხოლოდ აგრარული ბაზრობები.

ზემოთ ჩამოთვლილ დიდ ქალაქებში დაშვებული იქნება სავაჭრო ობიექტების მუშაობაც, თუმცა დამატებითი რეგულაციების პირობებში. კერძოდ, სამუშაო საათები განისაზღვრება დილის 7 საათიდან საღამოს 7 საათამდე. მაღაზიის ფართის ყოველ 20 კვადრატულ მეტრზე დაშვებული იქნება ერთი მომხმარებელი. შიდა და გარე სივრცეში რიგები უნდა გაკონტროლდეს. ფასდაკლებების აქციები უნდა გამოცხადდეს ან დილის საათებში, ან ონლაინგაყიდვების დროს. ამის მიზეზი კი, როგორც ცქიტიშვილმა თქვა, ისაა, რომ მაღაზიაში ბევრი ადამიანის კონცენტრაცია არ მოხდეს.

დამატებითი შეზღუდვები შეეხება ტანსაცმლის მაღაზიებსაც, სადაც გასახდელები აღარ იმუშავებს. გარდა ამისა, ცქიტიშვილი ამბობს, რომ მაღაზიებმა პროდუქციის დაბრუნება ან გადაცვლა უნდა დაუშვან ერთი თვის ვადაში და ეს უნდა მოხდეს მხოლოდ პირველი თებერვლის შემდეგ. სავაჭრო ცენტრებში იკრძალება კვების ობიექტების ფუნქციონირება, მათ შორის გატანის სერვისით.