ქართული ოცნების დეპუტატის, დავით სერგეენკოს განცხადებით, ბაზრობების არგახსნასთან დაკავშირებით გადაწყვეტილებას მთავრობას ვერ "დაუწუნებს". ის ვარაუდობს, რომ მთავრობამ ეს გადაწყვეტილება იმის გამო მიიღო, რომ ბაზრობებზე უფრო სწრაფი შეიძლება იყოს გავრცელების რისკი.

"ჩვენ ვითარება რეალურად ძალიან რთული გვაქვს, ალბათ სწორი იქნება, თუ ვიტყვი, რომ მძიმე ვითარებაა. ეს არის ომი უხილავ მტერთან და ძალიან სამწუხაროდ, უამრავი ადამიანი დიდ ზარალს მიიღებს ამ ომის შედეგად. რაც შეეხება კონკრეტულად ბაზრობებს, მე პირადად არ ვმონაწილეობ, თუმცა ვიცი გადაწყვეტილების მიღების მექანიზმი — იქნება რისკების ყოველდღიური აწონ-დაწონვა. როგორც ჩანს, ჩაითვალა, რომ ბაზრობებზე უფრო მეტი რისკი იყო გავრცელების. მთავრობას წინდახედულობას მე ვერ დავუწუნებ, ძალიან რთული კომპრომისი არის გასაკეთებელი სოციალურ დარტყმას და სიცოცხლეების დაკარგვას შორის. როგორც ჩანს, ამ ბეწვის ხიდზე გაიარა ამ გადაწყვეტილებამ და არა წინდაუხედავობაზე", — განაცხადა სერგეენკომ.

კორონავირუსული პანდემიის გამო, ქვეყანაში სხვადასხვა შეზღუდვები მოქმედებს.

24 დეკემბრიდან ძალაში რჩება მუნიციპალური ტრანსპორტის შეზღუდვა დიდ ქალაქებში — თბილისში, ბათუმში, ქუთაისში, რუსთავში, გორში, ფოთში, ზუგდიდსა და თელავში. ასევე, შეზღუდვები რჩება საქალაქთაშორისო ტრანსპორტთან დაკავშირებით. არ გაიხსნება ბაზრობები და იმუშავებენ მხოლოდ აგრარული ბაზრობები.

ზემოთ ჩამოთვლილ დიდ ქალაქებში დაშვებული იქნება სავაჭრო ობიექტების მუშაობაც, თუმცა დამატებითი რეგულაციების პირობებში. კერძოდ, სამუშაო საათები განისაზღვრება დილის 7 საათიდან საღამოს 7 საათამდე. მაღაზიის ფართის ყოველ 20 კვადრატულ მეტრზე დაშვებული იქნება ერთი მომხმარებელი. შიდა და გარე სივრცეში რიგები უნდა გაკონტროლდეს. ფასდაკლებების აქციები უნდა გამოცხადდეს ან დილის საათებში, ან ონლაინგაყიდვების დროს. ამის მიზეზი კი, როგორც ცქიტიშვილმა თქვა, ისაა, რომ მაღაზიაში ბევრი ადამიანის კონცენტრაცია არ მოხდეს.

დამატებითი შეზღუდვები შეეხება ტანსაცმლის მაღაზიებსაც, სადაც გასახდელები აღარ იმუშავებს. გარდა ამისა, ცქიტიშვილი ამბობს, რომ მაღაზიებმა პროდუქციის დაბრუნება ან გადაცვლა უნდა დაუშვან ერთი თვის ვადაში და ეს უნდა მოხდეს მხოლოდ პირველი თებერვლის შემდეგ. სავაჭრო ცენტრებში იკრძალება კვების ობიექტების ფუნქციონირება, მათ შორის გატანის სერვისით.