ჩრდილოეთ კაროლინის შტატში მცხოვრები 82 წლის შერვუდ ლი პოუპი და 78 წლის დორის ნოქს პოუპი კორონავირუსისგან გარდაიცვალნენ. წყვილს ერთმანეთი ერთად გატარებული ექვსი ათწლეულის შემდეგაც არ მიუტოვებია და მიუხედავად იმისა, რომ დაავადებას ებრძოდნენ, ბოლომდე გვერდიგვერდ დარჩნენ — ქალაქ როლის საავადმყოფოში ისინი ხელიხელჩაკიდებულები დაიღუპნენ.

წყვილის 57 წლის შვილი, ბრაინი, ამბობს, რომ მისი მშობლები გარდაცვალებამდე ერთი კვირით ადრე დაინფიცირდნენ კორონავირუსით, თუმცა, წარმოდგენა არ აქვს, როგორ.

"როცა გარეთ გადიოდნენ, პირბადე ეკეთათ", — აცხადებს ბრაიანი და დასძენს, რომ ზოგჯერ იყენებდნენ ხელთათმანებსაც.

დორის და შერვუდ პოუპები.

ფოტო: პოუპების ოჯახი

ჰოსპიტალიზაციისას დორისის მდგომარეობა იმდენად მძიმე იყო, რომ იგი ხელოვნური სუნთქვის აპარატზე გადაიყვანეს. ბრაიანის თქმით, მისი მშობლები ცალ-ცალკე ოთახებში იმყოფებოდნენ, თუმცა, როცა მათი მდგომარეობა გაუარესდა, შერვუდმა ექიმებს სთხოვა, მისი ცოლის გვერდით მოეთავსებინათ.

"გამუდმებით იმეორებდა, რომ დედაჩემის გვერდით ყოფნა სურდა", — ამბობს ბრაიანი, — "ასე რომ, საავადმყოფოს პერსონალმა გარდაცვალებამდე სამი-ოთხი საათით ადრე მათი საწოლები ერთმანეთის გვერდიგვერდ მოათავსა. მთელი ეს ხანი ხელიხელჩაკიდებულებმა გაატარეს, სანამ ამქვეყნიდან გავიდოდნენ და სამოთხის კარს შეაღებდნენ".

წყვილი თითქმის ერთდროულად გარდაიცვალა — ჯერ შერვუდი დაიღუპა, რამდენიმე წუთის შემდეგ კი დორისიც.

"დასაძინებლად ერთმანეთზე გაბრაზებულები არასდროს წასულან", — ამბობს ბრაიანი.

შვილმა მშობლებთან უკანასკნელი წუთების გატარება საავადმყოფოში დაწესებული შეზღუდვების გამო ვერ შეძლო. თუმცა იგი იმედოვნებს, რომ წყვილის ისტორია მხოლოდ სასიყვარულო ამბად არ დარჩება.

"პანდემია ხუმრობა არაა, ეს რეალურია", — დასძენს იგი.