ლევან ვარშალომიძემ აჭარის ავტონომიური რესპუბლიკის უმაღლეს საბჭოს დეპუტატის უფლებამოსილების შეჩერების განცხადებით დღეს, 27 იანვარს მიმართა. მან მალევე განაცხადა, რომ მანდატზე უარს ამბობდა, თუმცა ოფიციალურად უმაღლეს საბჭოს მხოლოდ დღეს მიმართა. დღეს გამართულ ბრიფინგზე ვარშალომიძემ განაცხადა, რომ 26 იანვარს, კანონის შესაბამისად აღებულ დიპლომატიურ პასპორტს დღეს უკან აბარებს:

"მე მინდა მოვაწერო ხელი განცხადებას, სადაც ვიხსნი უფლებამოსილებას უმაღლესი საბჭოს წევრობის. დღესვე ეს განცხადება შევა უმაღლეს საბჭოში, მაგრამ კიდევ ერთხელ მინდა განვაცხადო, უმაღლესი საბჭოს წევრობაზე უარი არ ნიშნავს, რომ ჩვენ არ ვიქნებით ბათუმში, აჭარაში, საქართველოში. არ ნიშნავს იმას, რომ ჩვენ ვტოვებთ და მე პირადად ვტოვებ ჩემს ამომრჩეველს, ჩემს მოსახლეობას, ჩემს ხალხს. გუშინ კანონმდებლობით გათვალისწინებული ავიღე დიპლომატიური პასპორტი, მაგრამ თქვენი თანდასწრებით, დღესვე მე ვაბარებ ამ პასპორტს."

საზოგადოებრივი მაუწყებლის აჭარის ტელევიზიის ინფორმაციით, ვარშალომიძე უმაღლეს საბჭოში გამართულ არც ერთ სხდომას არ დასწრებია. მიუხედავად ამისა, გაზეთ ბათუმელების ცნობით, ვარშალომიძემ დეკემბრის თვეში 4 290 ლარის ოდენობის ხელფასი და დანამატი მიიღო

ვარშალომიძე უმაღლეს საბჭოში ერთიანი ნაციონლური მოძრაობის მანდატით მოხვდა. ის ენმ-ის უმაღლესი საბჭოს საარჩევნო სიის პირველი ნომერი იყო.