თავდაცვის მინისტრის, თინა ხიდაშელის განმარტებით, დელტას დირექტორის, უჩა ძოძუაშვილის გადაყენების ბრძანებას მან ხელი უკვე მოაწერა, თუმცა თუ მოკვლევის შედეგად დელტას ბრალეულობა არ გამოიკვეთება, მას სამსახურში აღადგენენ:

"თავდაცვის სამინისტრომ ამ ინტერესის დასაკმაყოფილებლად და რეალობის საზოგადოების წინაშე საჩვენებლად მოკვლევა დაიწყო. გაირკვევა ყველაფერი და იმის შესაბამისად იქნება საბოლოოდ გადაწყვეტილება მიღებული".

ჟურნალისტმა ხიდაშელს ასევე შეახსენა, რომ მან ერთი წლის წინაც გამოხატა დელტას მუშაობით უკმაყოფილება, რაზეც ძოძუაშვილმა მაშინ განაცხადა, რომ ხიდაშელს მასთან უბრალოდ არ ჰქონდა კომუნიკაცია. აღნიშნულზე ხიდაშელმა უპასუხა, რომ ის არ თვლის საჭიროდ, მის დაქვემდებარებაში მყოფი პირების განცხადებაზე კომენტარები გააკეთოს.

გუშინ, 18 მაისს, კახეთში რამდენიმე დღის წინ მოსული სეტყვის დროს, დელტას სეტყვის საწინააღმდეგო სისტემის გაუმართავობასთან დაკავშირებით, დელტას გენერალური დირექტორი, უჩა ძოძუაშვილი თანამდებობიდან თავდაცვის მინისტრის ბრძანებით გადააყენეს.

მოგვიანებით ძოძუაშვილმა 20:30-ში განაცხადა, რომ მისთვის აბსურდულია ბრალდება, კახეთში, სეტყვის საწინააღმდეგო სისტემის გაუმართაობასთან დაკავშირებით. მისი თქმით, ის დარწმუნებულია, რომ აღნიშნულ საქმეში დელტას ბრალეულობა არ გამოვლინდება.