პრემიერმინისტრობის კანდიდატ გიორგი გახარიას განცხადებით, საქართველოს ეროვნული უსაფრთხოების სტრატეგიის დოკუმენტი გასაახლებელია. გახარიას თქმით, უშიშროების საბჭოში ამაზე მუშაობა უკვე დაწყებულია.

"საერთოდ გასაახლებელია საქართველოს ეროვნული უსაფრთხოების სტრატეგიის დოკუმენტი. რეალურად ჩვენი ძირითადი გამოწვევა აქ გახლავთ ოკუპაცია. დღეს ვმუშაობთ ორი ძირითადი მიმართულებით: ოკუპაცია და რა თქმა უნდა, თანამშრომლობა და თანამშრომლობის გაღრმავება ევროატლანტიკურ სტრუქტურებთან, პირველ რიგში NATO-ს ვგულისხმობ და ჩვენი ჯარების თავსებადობის გაზრდა", — განაცხადა გახარიამ პარლამენტში, ფრაქცია ქართული ოცნების წევრებთან შეხვედრისას.

დღეს პარლამენტში ფრაქცია ქართული ოცნების სხდომა მიმდინარეობს. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.