შინაგან საქმეთა მინისტრობის კანდიდატი, ვახტანგ გომელაური აცხადებს, რომ მეათეხარისხოვანია გრძნობს თუ არა ის ერთპარტიულ პარლამენტში ყოფნისას დისკომფორტს. მისი თქმით, მთავარი საკითხი ისაა, რომ ოპოზიციამ შეასრულოს ხალხის მინიჭებული ვალდებულება და პარლამენტში იმუშავოს.

"ძალიან ცუდია, ჩემი აზრით, ქვეყნისთვის პირველ რიგში. არა გომელაურის ან ვინმეს დისკომფორტი, ეს მეორე, მეათე ხარისხოვანია. მე ახლა კომფორტულად ვიჯექი შიგნით, თუ დისკომფორტს ვგრძნობდი, ეს სხვა თემაა.

ამ ხალხმა კეთილი უნდა ინებოს, ხმა რომ მისცა მოსახლეობამ, მე პატივს ვცემ, რა თქმა უნდა, ჩვენი გუნდი პატივს სცემს იმ ხალხს, რომელმაც ხმა მისცა ოპოზიციას, უნდა მობრძანდნენ, დაიკავონ თავისი სკამები და უნდა იმუშავონ და გააკეთონ, რაც იმ ხალხმა დაავალა. ეს არის დისკომფორტი და არა ის, კომფორტულად იჯდა შიგნით გომელაური, თუ დისკომფორტით კომიტეტზე", — განაცხადა მან.

ოპოზიციური პარტიები, რომლებმაც ცესკოს მონაცემებით ბარიერი გადალახეს ბოიკოტის რეჟიმში არიან, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. დანარჩენები კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას.