საქართველოს მთავრობა მიიჩნევს, რომ საქართველოში კიბერტერორიზმის საფრთხე და მისგან მოსალოდნელი ზიანის მასშტაბები იზრდება. ამის შესახებ საქართველოს მთავრობის მიერ დამტკიცებულ კიბერუსაფრთხოების 2017-1018 წლების ეროვნული სტრატეგიაში წერია.

სტრატეგიის მიხედვით, თანამედროვე პერიოდში ტერორისტულ დაჯგუფებებს მნიშვნელოვანი რესურსები აქვთ და ინფორმაციულ და საკომუნიკაციო ტექნოლოგიებს აქტიურად იყენებენ საკუთარი საქმიანობის მხარდაჭერისთვის.

„აღნიშნულის ნათელი დადასტურებაა ტერორისტული ორგანიზაციის ისლამური სახელმწიფო, რომელიც რეგულარულად ახორციელებს კიბერშეტევებს ანტიტერორისტული კოალიციის წევრი სახელმწიფოების კრიტიკული ინფორმაციული სისტემების წინააღმდეგ”, - წერია დოკუმენტში.

სტრატეგიის მიხედვით, ქვეყნისთვის მთავარი საფრთხე რუსეთის ფედერაციის მიერ ორგანიზებული კიბერშეტევები და კიბერსაშუალებებით ჩადენილი დანაშუალებია.