ქართული ოცნების ერთ-ერთი ლიდერის, მამუკა მდინარაძის განცხადებით, ამნისტიის შესახებ კანონპროექტს შესაძლოა, მსჯელობის შედეგად მუხლები დაემატოს ან ამოაკლდეს. მისი თქმით, პროექტი შეიცვლება და კიდევ უფრო დაიხვეწება.

"ეს არის სადისკუსიოდ შემოტანილი პროექტი. ანუ, ეს იმას ნიშნავს, თავისთავად, რომ არ არის საბოლოო პროექტი. თუ იქნება კრიტიკული შეკითხვები და ეს არგუმენტებით იქნება ნაკარნახევი, მაშინ შეიძლება რაღაც მუხლი იყოს მითითებული და ის აღარ დარჩეს პროექტში, ან თუ იქნება არგუმენტები, რატომ უნდა ჩაემატოს ამ ხასიათის დანაშაულებთან დაკავშირებით კიდევ სხვა მუხლი, მაშინ შეიძლება არაერთი მუხლი დაემატოს. მსჯელობა მიდის ამასთან დაკავშირებით, ფართო წრის განსაზღვრაც ხდება, ვინც მონაწილეობას მიიღებს ამაში", — თქვა მდინარაძემ.

16 დეკემბერს ქართული ოცნების დეპუტატმა, მიხეილ სარჯველაძემ განცხადა, რომ საქართველოს პარლამენტში ინიცირებული იქნება საქართველოს კანონის პროექტი ამნისტიის შესახებ, რომლის მიხედვითაც ამნისტია შეეხება სულ 44 მუხლით გათვალისწინებულ დანაშაულს და აქ არ შევა ისეთი მძიმე დანაშაულები, როგორიცაა მკვლელობა, ოჯახური ძალადობა და სხვა.

აღნიშნულთან დაკავშირებით, მმართველი პარტიის აღმასრულებელმა მდივანმა, ირაკლი კობახიძე განაცხადა, რომ ამნისტიის შესახებ კანონში თითოეული მუხლი იყო "პრინცპიულად გავლილი, ამიტომ არცერთი მუხლი ამ კანონს არ დაემატება".