ევროპული საქართველოს ერთ-ერთმა ლიდერმა, გიგი უგულავამ მმართველი პარტიის აღმასრულებელი მდივანი, ირაკლი კობახიძე შეურაცხმყოფელად მოიხსენია და თქვა, რომ კობახიძის განცხადება ქართული ოცნების ახალი ინიციატივების შესახებ იყო "ვერბალური დიარეა განუვითარებელი ღლაპის მხრიდან".

"მივიღეთ ჩვეულებრივი, უტიფარი ვერბალური დიარეა, ძალიან სამწუხარო საყურებელი, ამ რაღაც განუვითარებელი ღლაპის მხრიდან. სერიოზული კომენტარი აქ არ შეიძლება. სერიოზული კომენტარი საჭიროებს იმას, რომ ივანიშვილის რეჟიმი, ნაბიჯ-ნაბიჯ, სამწუხაროდ, სწორუპოვრად ფორმირდება, როგორც ჩვეულებრივი ავტოკრატია და მიემართება დიქტატურისკენ", — თქვა მან TV პირველის ეთერში.

მან მორიგი შეურაცხმყოფელი განცხადება გააკეთა პირდაპირ ეთერში და თქვა, რომ ერთადერთი ადეკვატური პასუხი ქართული ოცნების მიერ დაანონსებულ ახალ ინიციატივებზე იქნება, რომ "დაახვიონ და უკან შეიტენონ".

მმართველი პარტიის აღმასრულებელი მდივნის, ირაკლი კობახიძის განცხადებით, დეპუტატებს, რომლებიც მანდატებზე უარს იტყვიან, არამხოლოდ მანდატებს შეუჩერებენ, არამედ პარტიებს საბიუჯეტო დაფინანსებასაც შეუწყვეტენ. ამასთან, მისი თქმით, დააინიცირებენ ახალ კანონპროექტს, რომლის მიხედვითაც, საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

ამავე თემაზე: