თბილისის მერის, კახა კალაძის განცხადებით, არსებობს ეჭვი, რომ უკანონო მშენებლობებთან დაკავშირებით თაღლითურ სქემასთან აქვთ საქმე. მისი თქმით, მერია შესაბამის უწყებებს გადასცემს მასალებს, რათა საქმის მოკვლევა დაიწყოს.

"გვაქვს საფუძვლიანი ეჭვი, რომ საქმე გვაქვს თაღლითურ სქემასთან, რომლის უკან დგანან გარკვეული პირები, რომლებიც ეკონომიკური სარგებლის მიღების მიზნით, მოქალაქეებს კანონდარღვევისკენ უბიძგებენ. თბილისის მერია შესაბამის უწყებას მიაწვდის ყველა მასალას, რათა დაიწყოს საქმის მოკვლევა. ორივე ქმედება: მიწის დატაცება და უკანონო მშენებლობა, არის კანონით დასჯადი", — განაცხადა კალაძემ.

კალაძემ განაცხადა ისიც, რომ იმ ადამიანებს, რომლებიც იქ სახლებს აშენებენ, უკვე აქვთ სხვა საცხოვრებლები და მიზანმიმართულად იკავებენ სახელმწიფო მიწებს. კალაძის თქმით, ბოლო წლებში მოქალაქეებმა, რომლებსაც აქვთ უძრავი ქონება რეგიონებში, თბილისში უკანონო მშენებლობები დაიწყეს.

თბილისში, აფრიკის დასახლებაში ქალაქის მერიამ შენობა-ნაგებობების დემონტაჟი დაიწყო. არსებული ინფორმაციით უკვე 20-მდე მშენებარე სახლი დაანგრიეს. ადგილობრივ მოსახლეობასა და პოლიციას შორის ფიზიკური დაპირისპირებაც მოხდა. შედეგად 8 ადამიანი დააკავეს.