ნაციონალური მოძრაობის ერთ-ერთი ლიდერის, ხატია დეკანოიძის თქმით, ხელისუფლება უკანონო თვალთვალსა და შანტაჟს ახალისებს. ნიკა გვარამიას განცხადებასთან დაკავშირებით, სადაც ის მის შესაძლო დაკავებაზე საუბრობს, დეკანოიძემ გვარამიასა და მის ოჯახს სოლიდარობა გამოუცხადა.

"ქვეყანაში არის უკანონო მიყურადება, შანტაჟი, მუქარა. კონსტიტუციისა და საერთაშორისო კონვენციების დარღვევით ხელისუფლება ებრძვის პოლიტიკურ ოპონენტებს, მედია მენეჯერებისა და ყველა იმ ადამიანს, რომელიც ღიად და აქტიურად ილაშქრებს რეჟიმის წინააღმდეგ. ისინი მართლმსაჯულების ყველა რგოლს იყენებენ იმისთვის, რომ ვინც გზაზე გადაეღობებათ, მათ უთვალთვალონ", — განაცხადა დეკანოიძემ.

მთავარი არხის დირექტორის, ნიკა გვარამიას თქმით, მას შეუთვალეს, რომ ახალ წლამდე დაიჭერდნენ და რუსთავი 2-ისთვის ზიანის ანაზღაურების მიზეზით მთელ ქონებას ჩამოართმევენ.

როგორც იგი წერს, ეს ინფორმაცია მიწოდებულია ფასილიტატორი ელჩებისთვისაც და დაკავების მიზეზად მისი "ანტიდასავლური პოზიცია" დაუსახელეს.

"რას ამბობთ? უთვალთვალებენ? მზეთუნახავი ჰყავს სახლში, რომ უთვალთვალებენ, თუ რატომ არის გაღიზიანებული", — ასე გამოეხმაურა იუსტიციის ყოფილი მინისტრი და პარლამენტის მოქმედი დეპუტატი, თეა წულუკიანი განცხადებას, რომ მის ოჯახს უთვალთვალებენ.

წულუკიანმა, გვარამიას გამოსვლებს, ასევე, არის სრულად "გაბომჟებული" პერფორმანსი უწოდა.

ნიკა გვარამიას წინააღმდეგ გამოძიება 2019 წლის ივლისში დაიწყო. მას რუსთავი 2-ის დირექტორად ყოფნის პერიოდში ტელეკომპანიის საწინააღმდეგო გადაწყვეტილებების მიღებას ედავებიან. კერძოდ, გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებიან. მას, ასევე, ფულის გათეთრება ედება ბრალად.

თვეების განმავლობაში გვარამიას საქმის განხილვა სასამართლოში შეჩერებული იყო, თუმცა დეკემბრის დასაწყისში ცნობილი გახდა, რომ მისი და კიდევ სამი ოპოზიციონერის — ნიკა მელიას, ირაკლი ოქრუაშვილისა და გიგი უგულავასთან კავშირში არსებული საქმეები განახლდებოდა. თუმცა, მოგვიანებით ყველა საქმეზე პროცესები ისევ გადაიდო.