ოკუპირებული გალის რაიონის სოფელ ჭუბურხინჯში ქვეითად მოსიარულე კაცს მანქანა დაეჯახა. ადგილობრივების თქმით კი, კვალის დაფარვის მიზნით, სავარაუდოდ, ადგილზე გარდაცვლილი პირი მდინარეში გადააგდეს. როგორც ჭუბურხინჯის მცხოვრებლებმა On.ge-ს უთხრეს, შემთხვევა 12 დეკემბერს, საღამოს საათებში მოხდა.

"60 წლამდე იქნებოდა. მარტო იყო სოფელში, რაც "საზღვარი" დაიკეტა ცოლ-შვილი და შვილიშვილები არ ჰყავდა ნანახი და საახალწლოდ უნდა წავიდე როგორმეო ამბობდა. გზაზე მაინც დაეტოვებინათ, იქნებ გადარჩენის შანსი ჰქონდა. გზაზე, არხთან მისი ერთი ფეხსაცმელი უნახავთ, ალბათ, ვერ შეამჩნიეს ღამე რომ გაძვრა, როცა მდინარეში ჩააგდეს", — ამბობს On.ge-სთან ჭუბურხინჯის ერთ-ერთი მცხოვრები.

ადგილობრივების თქმით, დანაშაულის ჩამდენები ნასვამ მდგომარეობაში იყვნენ და მანქანას სწრაფად მართავდნენ.

მათივე თქმით, მას შემდეგ რაც ადგილობრივმა დე ფაქტო მილიციამ მომხდარის მოკვლევა დაიწყო, ეჭვმიტანილები მილიციას ჩაბარდნენ. ჯერჯერობით, უცნობია, რამდენს მიუსჯიან დამნაშავეებს. გალელების თქმით, ეს იმაზეა დამოკიდებული, რამდენად სარგებლობენ აღნიშნული პირები გავლენებითა და ნაცნობთა წრეებით.