აშშ-ში, პრეზიდენტ ტრამპის ინაუგურაციის დღეს, ანტი-ტრამპის დემონსტრაციების დროს 200-მდე ადამიანთან ერთად, სულ მცირე, 6 ჟურნალისტი დააკავეს. ინფორმაციას ამის შესახებ The Guardian ავრცელებს.

ჟურნალისტებს შორის არიან ევან ენგელი - Vocativ, ალექსანდერ რუბინშტაინი - Russia Today, დოკუმენტალისტი პროდიუსერი ჯეკ კელერი, ფრილანსერი აარონ ქარტუ და დამოუკიდებელი ჟურნალისტები - შეი ჰორსი და მეტ ჰოპარდი.

ბრალის დამტკიცების შემთხვევაში, მათ 10 წლით თავისუფლების აღკვეთა და 25 ათასი დოლარის ოდენობის ჯარიმა ემუქრებათ.

ჟურნალისტებისთვის, რომლებიც დემონსტრაციებს აშუქებდნენ, ბრალდების მოხსნას მოითხოვს ჟურნალისტთა დაცვის კომიტეტი (CPJ):

"ეს ბრალდებები ნამდვილად მიუღებელია. ჩვენ ვწუხვართ, რომ ამ ფაქტმა შესაძლოა დააფრთხოს ჟურნალისტები, რომლებიც მომავალში გააშუქებენ დემონსტრაციებს. მოვუწოდებთ სამართალდამცველებს ვაშინგტონში, რომ დაუყოვნებლივ მოხსნან ბრალდებები."

გარდიანის ცნობით, არც ერთი ოფიციალური ოქმი არ ამბობს, თუ კონკრეტულად რა დააშავა 6 ჟურნალისტიდან რომელიმემ. ერთი-ერთის ოქმის თანახმად, პოლიციის მანქანა დაზიანდა, თუმცა ჟურნალისტი ამ ბრალდებას უარყოფს და ამბობს, რომ ვანდალიზმთან არანაირი კავშირი არ აქვს.

ექვსიდან ხუთი ჟურნალისტის დაკავების ოქმები იდენტური ტექსტის შემცველია და წერია, რომ "პოლიციის თანდასწრებით რამდენიმე დანაშაული იქნა ჩადენილი." ამ დოკუმენტების ცნობით, მათ ფანჯრები ჩაამსხვრიეს და პოლიციის მანქანები დააზიანეს.

ჟურნალისტების საქმეზე წინასწარი მოსმენა თებერვალსა და მარტშია ჩანიშნული. ისინი ამჟამად გათავისუფლებულები არიან.