ევროპული საქართველოს ერთ-ერთი ლიდერის, გიგა ბოკერიას თქმით, დიდი ალბათობით ISFED-ის პარალელურ დათვლაში მიღებული ხმების გამოსათვლელ ფორმულაში გამოვლენილი ხარვეზების შესახებ ქართულმა ოცნებამ "უკანონოდ ან მიყურადების" ფორმით იცოდა და მახეს უგებდა ოპოზიციას.

"ბატონმა კობახიძემ საჯაროდ ბრძანა — ამიტომ ამ შემთხვევაში არანაირი საიდუმლოს გაცემას არ ვახდენ, რაც საჯაროდ თქვა, იგივე გზავნილი ჰქონდა მოლაპარაკებებზეც — რომ მოდი, ჩავუჯდეთ სამართლიანი არჩევნების პარალელურ დათვლას და თუ დადასტურდა რომ იქ ემთხვევა შედეგი, მაშინ თქვენ აღიარეთ არჩევნები, თუ არ დადასტურდა, მაშინ ჩავატარებთ ახალ არჩევნებსო", — განაცხადა მან ფორმულას ეთერში.

ISFED-ის ცნობით, საპარლამენტო არჩევნების შემდეგ ხმების პარალელური დათვლის პირველადი, შიდა აუდიტი განახორციელა. მათი ინფორმაციით, შედეგებმა PVT მეთოდოლოგიის სიზუსტე და დამკვირვებლების მიერ მოწოდებული ინფორმაციის სანდოობა დაადასტურა. თუმცა გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში.

მანამდე ცნობილი გახდა, რომ მმართველი პარტიის წარმომადგენლები ISFED-ს შეხვდნენ. ქართულ ოცნებაში აცხადებდნენ, რომ შეხვედრა ISFED-ის მიერ ჩატარებული პარალელური ხმის დათვლის შედეგებს ეხებოდა და მათ ორგანიზაციას მეთოდოლოგიის შესახებ მონაცემების წარმოდგენა მოსთხოვეს.