ქართული ოცნების წევრმა, ირაკლი (დაჩი) ბერაიამ განაცხადა, რომ ზოგიერთი ოპოზიციონერი ლიდერის პარლამენტში არშესვლა მთელი საქართველოსთვის კომფორტული იქნება. ასე უპასუხა მან ჟურნალისტების კითხვას, კომფორტული იქნებოდა თუ არა მისთვის ერთპარტიულ პარლამენტში მუშაობა.

"მართალი რომ გითხრათ, ზოგიერთი მათგანის არშემოსვლა მთელი საქართველოსთვის იქნება კომფორტული [...] ბოლო თვეების და წლის განმავლობაშიც კი, ესეთივე იდილია იყო ყოველთვის — ისინი მუდმივად ბოიკოტის რეჟიმში იყვნენ და ეს ახალი არაა, არც საზოგადოებისთვის და არც ჩვენთვის", — განაცხადა ბერაიამ.

დღეს მე-10 მოწვევის პარლამენტი პირველად შეიკრიბა, თუმცა ოპოზიციის გარეშე. ბარიერგადალახულმა ყველა პარტიამ, ამ დროისთვის, საკანონმდებლო ორგანოში შესვლაზე უარი განაცხადა. ისინი არჩევნების შედეგებს გაყალბებულად მიიჩნევენ და არ აღიარებენ.